Այն իմունիտետը բարձրացնող, պատրաստի «վիտամինային փունջ» է։
Հայ առաքելական եկեղեցու կարեւորագույն իրադարձություններից մեկը՝ մյուռոնօրհնեքը, որ կայանար հոկտեմբերի 1-ին, Արցախում տեղի ունեցած երկօրյա տարեզամի, այնուհետեւ՝ արցախցիների բռնի տեղահանման պատճառով՝ անհայտ ժամանակով հետաձգվեց։
Նախքան բուն արարողությունը՝ Azg.am-ը ներկայացնում էր, թե մյուռոնի օրհնությանն ընդառաջ՝ ինչ նախապատրաստություններ են կատարվում։
Վերջին իրադարձությունների հետ կապված՝ մենք նույնպես դադար էինք առել, բայց հուսալով, որ Հայ Եկեղեցու սրբալույս մյուռոնը իսկապես լույս կփռի թե՛ արցախահայության, թե, առհասարակ, համայն հայության վրա՝ շարքը որոշեցինք շարունակել։ Արդեն պատմել ենք, որ նախքան մյուռոնօրհնությունը դրա բաղադրիչ մի քանի տասնյակից ավելի բույսերն ու նյութերը եփվում են հատուկ կաթսայի մեջ (կաթսայի մասին առանձին կպատմենք)։
«Դրանցից յուրաքանչյուրը մշակման իրեն բնորոշ ձեւ կամ եղանակ ունի. կան նյութեր, որոնք հոտն ու որոշ հատկություններ չկորցնելու համար նախքան օգտագործումը հատուկ խնամք են պահանջում»,- Azg.am-ի հետ զրույցում ասում է Մայր Աթոռ Սուրբ Էջմիածնի Դիվանատան Եկեղեցական-ժողովական գրասենյակի պատասխանատու Տեր Տիգրան քահանա Բադիրյանը։
Տեր հայրը նշում է նաեւ, որ բաղադրիչների մշակումը կատարվում է միայն հոգեւորականների կողմից, եւ նախապատրաստական փուլն անցելուց հետո բույսերը, յուղերն ու հեղուկները եփման կաթսայի մեջ խառնվում են իրար․ «Վեհափառ Հայրապետի հանդիսապետությամբ, օրհնության կարգ է կատարում, եւ վառվում է կրակը, ինչից հետո երեք օր շարունակ նյութերը կրակի վրա (հեղուկի գոլորշու մեջ՝ շոգիացման եղանակով) եփվում են: Թե՛ մյուռոնի նախապատրաստության, թե՛ երեք օր ու գիշեր եփման ընթացքն ուղեկցվում է հոգեւորականների աղոթքներով, սաղմոսների ու շարականների երգեցողությամբ»:
Սրբալույս մյուռոն ստանալու համար անհրաժեշտ ծաղիկները բերվում են ամբողջ աշխարհից: Անուշահոտ յուղի ամենակարեւոր բաղադրիչը ձիթապտղի ձեթն ու բալասանն են։ «Գերմանացի կենսաբան Շտեֆան Հայմանն է ուսումնասիրել հայկական մյուռոնի կենսաբանական հատկանիշներն ու պարզել՝ այն ոսկորից չի ջնջվում:
Կենսաբանը նաեւ պնդում է, որ մյուռոնը ուժեղացնում է մարդու իմունիտետն, այսինքն, այսպես ասած, «վիտամինային փունջ» է, որ պայքարում է ցանկացած տեսակի վիրուսի դեմ»,- մանրամասնում է մեր զրուցակիցը։
Սեւակ Վարդումյան
Կարդացեք նաև՝ Ի՞նչ կապ ունի Սբխեչը (Խաչվերացը) Մյուռոնօրհնեքի հետ
