Հայաստանի ոչ մետաղական հանքանյութերի համալիր վերամշակման նոր արտադրատեսակները միջազգային ասպարեզում կարող են շատ մրցունակ լինել: Հայաստանն ունի պեռլիտի մեծ պաշարներ, իսկ հրաբխային ապարների պաշարներն ամենաշատն են Հայաստանում: Տեսակետը Քարակերտի քարաձուլման գործարանի ՓԲԸ տնօրեն, 1992-1995թթ «Հարարդշին» պետական ձեռնարկության փոխնախագահ Սուրեն Գեւորգյանինն է: Նա համոզված է, որ ոչ մետաղական նյութերի վերամշակմամբ Հայաստանը կարող է նորովի ներկայանալ աշխարհին եւ դա կդառնա Հայաստանի այցեքարտը:
«Սա է երկրի պոտենցիալը, նրա այցեքարտը: Պեռլիտից ստացվում են ջերմամեկուսիչ նյութեր, ինչն այսօր արտադրում են ԱՄՆ-ն եւ Գերմանիան ու հսկայական շահույթ ստանում, իսկ Հայաստանը, պաշարներ ունենալով հանդերձ, չի զբաղվում արտադրությամբ: Ամերիկյան մի ընկերություն աշխարհի 33 երկրների տարեկան 6 միլիարդ դոլարի այդ նյութերն է վաճառում: Պեռլիտից ստացվող նյութերն ավելի շահութաբեր են, քան մետաղականը», ասաց Գեւորգյանըՙ հավելելով, որ ջերմամեկուսիչ նյութերի կիրառմամբ Հայաստանը 2 ատոմակայանի էներգիա կարող է տնտեսել, կկարողանանք խնայել գազ եւ էլեկտրաէներգիա, իսկ ջեռուցման ծախսը 10 անգամ կկրճատվի:
Սուրեն Գեւորգյանը հավաստիացնում է, որ կան հստակորեն մշակված ծրագրեր: «Պետք է հասնել էներգախնայողության. Հայաստանն ունի այդ հնարավորությունը: Միայն Քարակերտի գործարանը կարող է 2000 աշխատատեղ բացել», ասաց Գեւորգյանը:
