Ռուսաստանի հայերի միությունը դիմել է համայն հայությանը՝ անտարբեր չմնալ և իրենց վերաբերմունքը հայտնել Արցախը Ադրբեջանին հանձնելու՝ Հայաստանի կառավարության անարդար որոշման նկատմամբ։
ՌՀՄ-ն ընդգծում է, որ Հայաստանի իշխանությունները ստիպում են ողջ հայ հասարակությանը անցնել պատմական այդ «կարմիր գիծը», որը հատելը յուրաքանչյուր հայի և ողջ հայության համար նշանակում է մեր դարավոր պատմության, մեր հոգևոր արժեքների, բարոյականության արժեզրկում։
Կոչում ասվում է, որ «Արցախը հայ քաղաքակրթության բնօրրանն է, բոլոր հայերի հայրենիքը, որտեղ էլ որ նրանք ապրեն։ Իսկ Արցախի ճակատագիրը որոշելիս չի կարելի անտեսել տասը միլիոն հայի կարծիքն ու հավաքական կամքը»։
Հայտարարության մեջ ասվում է, որ Ադրբեջանի տարածքային ամբողջականության ոչ մի ճանաչում՝ Լեռնային Ղարաբաղի ընդգրկմամբ, չի կարող չեղյալ համարել Արցախի ժողովրդի ինքնորոշման իրավունքը, թեկուզ դրա վերաձևակերպմամբ՝ «անջատում՝ հանուն փրկության» անվամբ։
«Կոչ ենք անում Հայաստանի իշխանություններին լսել աշխարհասփյուռ մեր հայրենակիցների ձայնը, քանի որ Արցախի ժողովրդի ճակատագրի, հայկական պետության ու հայության ճակատագրի համար պատասխանատվությունն ուղղակիորեն կրում է Հայաստանի ներկայիս ղեկավարությունը», – ընդգծում է ՌՀՄ-ի հայտարարության մեջ։
«Հայաստանի, Արցախի ժողովրդի շահերը պաշտպանելու համար, որպեսզի Արցախը գոյատևի և հավերժ մնա հայ, այսօր մեզ անհրաժեշտ է աշխարհասփյուռ հայության համախմբումը, համաշխարհային հայկական էլիտայի համախմբումը՝ առանց հապաղելու»,- կոչ են անում Ռուսաստանի հայերի միությունը։
