Համազգային մշակութային միության կողմից լույս է տեսել «Ժամանակակից հայ արձակի հիմնախնդիրներ» ժողովածուն, որը ներառում է 2013թ. ապրիլի 5-ին եւ 6-ին ԵՊՀ-ում եւ Ծաղկաձորի գրողների ստեղծագործական տանը տեղի ունեցած գիտաժողովի նյութերը:
Երկօրյա գիտաժողովը, որը նախաձեռնել էին «Համազգայինը», ԵՊՀ-ն ու Գրողների միությունը, նպատակ ուներ համակողմանիորեն, գրականագիտական արդիական չափանիշներով արժեւորելու հայ արձակը, անդրադառնալու նրա հիմնախնդիրներին, զարգացման միտումներին ու հեռանկարներին
Ժողովածուն ամփոփում է Հայաստանը եւ Սփյուռքը ներկայացնող քսան գրաքննադատների Անուշ Աբելյանի, Արքմենիկ Նիկողոսյանի, Հայկ Համբարձումյանի, Դիանա Համբարձումյանի, Լեւոն Մութաֆյանի, Վահրամ Դանիելյանի, Ալիս Հովհաննիսյանի, Ալվարդ Սեմերջյան-Բեքմեզյանի, Իշխան Չիֆթճեանի (Գերմանիա), Անի Փաշայանի, Արմեն Ավանեսյանի, Կարինե Հարությունյանի, Սաթենիկ Ավետիսյանի, Սուրեն Դանիելյանի, Սիրանուշ Դվոյանի, Թադեւոս Խաչատրյանի, Անահիտ Հակոբյանի, Յակոբ Պալեանի (Ֆրանսիա), Անի Փաշայանի, Ժենյա Քալանթարյանի ուսումնասիրությունները, որոնք անդրադառնում են ժամանակակից հայ արձակի քննադատությանը, դրա հերոսներին, վտանգված ինքնության հիմնախնդիրներին, հետանկախացման շրջանի հայ արձակի որոշ ֆենոմենների, համակողմանիորեն վերլուծում Աղասի Այվազյանի, Նորայր Ադալյանի, Գուրգեն Խանջյանի, Լեւոն Խեչոյանի արձակը, անդրադառնում նաեւ սփյուռքահայ արձակի խնդիրներին եւ փիլիսոփայական ուղղություններին: Այս քսան զեկույցներն, անշուշտ, մերօրյա հայ արձակի ողջ պատկերն ու նրա գրականագիտական համընդգրկուն քննությունը ներկայացնելու հավակնություն չունեն, բայց, վստահաբար, անդրադառնում են նորագույն շրջանի հայ արձակի ընթացքին, նրա գեղարվեստական ու բովանդակային հարցադրումներին, ներժանրային առանձնահատկություններին ու բազմազանությանը եւ առհասարակ նրա գեղարվեստական ձեւի փնտրտուքին ու որոնումներին:
Ժողովածուն կազմել եւ խմբագրել է Լիլիթ Գալստյանը, տպագրվել է «Անտարես» հրատարակչությունում:
Վստահաբար, ժամանակակից հայ արձակի հիմնախնդիրների քննությունը ներկայացնող այս գիրքն արժեքավոր է ոչ միայն բանասիրական ամենալայն շրջանակների համար, այլ նաեւ հայ գրականության ընթացքով հետաքրքրված ընթերցողների:
