Լոնդոնի «Ապոլլո» թատրոնի առաստաղի մի մասի փլուզման հետեւանքով դեկտեմբերի 19-ի երեկոյան տուժել է առնվազն 76 մարդ, հաղորդում է BBC News հեռուստաալիքը: Փլուզումը տեղի է ունեցել «Շան առեղծվածային գիշերային սպանություն» ներկայացման ժամանակ:
Ականատեսները եւ տուժածները պատմել են, որ փլուզումից առաջ լսվել է ճարճատյուն: Ոմանք էլ հայտարարել են, որ նախքան փլուզումը առաստաղի ճեղքերից սկսել է ջուր հոսել:
775 տեղանոց դահլիճում եղել է 720 հանդիսական: Նրանցից 7-ը ծանր վիրավորվել են, սակայն ոչ մեկի կյանքին վտանգ չի սպառնում: Բժիշկները տեղում օգնություն են ցույց տվել 51 մարդու:
Առաստաղի մի մասը փլուզվել է ներկայացման սկզբից 45 րոպե անց: Մարկ Հեդդոնի վեպի հիման վրա բեմադրված վերոհիշյալ ներկայացումը 2013-ին ստացել է Լոուրենս Օլիվիեի 7 թատերական մրցանակ, նշում է «Դեյլի մեյլ» թերթը:
Միջադեպի պատճառները դեռ անհայտ են: Ոստիկանությունն անմիջապես հերքել է ահաբեկչության կամ հանցավոր գործունեության վարկածը: Փրկարարները չեն կարծում, թե հարեւան շենքի շինարարական փայտամածները որեւէ կապ ունեցած լինեն առաստաղի փլուզման հետ: Փլուզումից 1 ժամ առաջ Լոնդոնում եղել էր սաստիկ ամպրոպ, սակայն պարզ չէՙ դա ազդե՞լ է արդյոք փլուզման վրա:
«Ապոլլո» թատրոնի շենքը կառուցվել է Լոնդոնի կենտրոնումՙ Ուեսթ-Էնդ շրջանում 1901-ին եւ համարվում է պատմության հուշարձան: Թատրոնը գործում է նույն թվականից:
