«Վաշինգտոն փոստ» թերթի պնդման համաձայն, Ուկրաինայի ապագան կախված է ոչ թե ԱՄՆ-ից ու Եվրոպայից, այլ Ռուսաստանի գործողություններից: Ըստ որում, ամերիկյան թերթը կարծում է, որ ՌԴ նախագահ Վլադիմիր Պուտինը ներկայումս քննարկում է իրադարձությունների զարգացման երեք հնարավոր տարբերակ:
Առաջինը Ուկրաինայի հետ համաձայնագրի կնքումն է եւ Ուկրաինայի դաշնային կառուցվածքի ստեղծումը: Այս դեպքում երկրի ռուսալեզու արեւելքը կդառնա Կիեւի իշխանություններից բավական անկախ, բայց, հավանաբար, Ռուսաստանից ավելի մեծ չափով կախված: Նման իրավիճակում Պուտինը կստանա Ուկրաինայի քաղաքականությունը կառավարելու լծակներ: Երկրորդ տարբերակը Ղրիմի օրինակով Ուկրաինայի արեւելյան մարզերի միացումն է Ռուսաստանին, որտեղ ռուսամետ ցուցարարները արդեն իսկ պահանջել են միացման հանրաքվեի անցկացում: Երրորդ տարբերակը Մոսկվայի ռազմական միջամտությունն է Ուկրաինայի արեւելքում քաղաքացիական պատերազմի առկայության պատրվակով:
Թերթը նշում է, որ բոլոր երեք սցենարներն էլ անցանկալի են Արեւմուտքի երկրների համար:
Ամերիկացի վերլուծաբանները կարծում են, որ Պուտինը դժվար թե ներխուժելու որոշում ընդունի, քանզի «նախընտրում է պահպանել օրինականության երեւութականությունը», եւ նախկին հետախույզի բնազդները նրան դրդում են դիմել ավելի շուտ գաղտնի գործողության: Միաժամանակ թերթը տագնապահարույց նշան է համարում ռուսական զորքերի ներկայությունը Ուկրաինայի սահմանի մոտ:
Ներկայումս Ուկրաինայի արեւելքում անցկացվող բողոքի ելույթների ընթացքում ռուսամետ ակտիվիստները գրավում են վարչական շենքեր: Բողոքավորների պահանջները, սակայն, այնքան էլ հստակ չեն. նրանք մերթ պահանջում են Ուկրաինայի դաշնայնացում, մերթ հայտարարում են ուկրաինական տարածքի մի մասի անկախացման մասին, մերթ էլ Ռուսաստանին միանալու ցանկություն են հայտնում:
Ուկրաինայի իշխանությունները կարծում են, թե հանրահավաքներն ու անկարգությունները կազմակերպում են Ռուսաստանի քաղաքացիները: Kyiv Post-ը Facebook-ում հրապարակել է մի «փաստաթուղթ», որն իբր մշակված է ՌԴ ազգային անվտանգության խորհրդում եւ որի համաձայն Ռուսաստանը մտադիր է զավթել Ուկրաինայի «բոլոր ռուսական մարզերը», ներառյալ Կիեւը: Այդ «փաստաթուղթը» արդեն ճանաչվել է իբրեւ սադրանք:
Ռուսաստանի ԱԳՆ-ում հայտարարում են, որ Ուկրաինայի արեւելյան եւ հարավարեւելյան մարզերի բռնակցումը «ներհակ է Ռուսաստանի դաշնության արմատական շահերին»: Մինչդեռ հայտնի լիբերալ-դեմոկրատ քաղաքական գործիչ Վլադիմիր Ժիրինովսկին հայտարարել է, որ Ուկրաինայի հարավ-արեւելքը իրականում Ռուսաստանի մասն է: Նա մանրամասնել է, որ հարկավոր է ՌԴ կազմի մեջ մտցնել «ժամանակավորապես ուկրաինական դրոշի տակ գտնվող ինը հարավարեւելյան շրջաններ»:
