Վարչապետ Հովիկ Աբրահամյանը երեկ տեղի ունեցած կառավարության նիստի ժամանակ անդրադարձավ Հայաստանի գործարար աշխարհի ներկայացուցիչների հետ նախորդ օրը իր ունեցած հանդիպմանը: Տեղեկացնելով, որ ինքը հանդիպել է խոշոր գործարարների եւ բանկերի ղեկավարների հետ, վարչապետը հայտնեց, որ պայմանավորվածություն է ձեռք բերվել, որ «բոլորը պետք է աշխատեն հավասար դաշտում, եւ բոլորն ամեն ինչ պետք է անեն, որպեսզի ստվերից դուրս գան»:
Հովիկ Աբրահամյանը նշեց, որ մինչեւ հուլիսի 1-ը հնարավորություն է տրվելու, որպեսզի գործարարներն իրենք ինքնուրույն իրենց ցանկությամբ փորձեն աշխատել հավասար դաշտում: «Մենք անպայման հետամուտ ենք լինելու, որպեսզի խաղի կանոնները բոլորը պահպանեն», ասաց վարչապետը: Թե ինչպե՞ս է դա արվելու, Հովիկ Աբրահամյանը չմանրամասնեց:
