Նախագահ Սերժ Սարգսյանն երեկ մասնակցեց Խաչատուր Աբովյանի անվան հայկական պետական մանկավարժական համալսարանի 2013-2014 ուսումնական տարվա շրջանավարտների դիպլոմների հանձնման հանդիսավոր արարողությանը:
Հանրապետության Նախագահը գերազանցության դիպլոմներ հանձնեց Մանկավարժական համալսարանի շուրջ երկու տասնյակ լավագույն շրջանավարտների, շնորհավորեց նրանց ուսումնական շրջանն ավարտելու եւ ուսուցչի բարձր կոչմանն արժանանալու կապակցությամբ, մաղթեց անձնական երջանկություն եւ մասնագիտական հաջողություններ:
«Այսօր ձեզնից մի մասը ստացավ դիպլոմներ, մյուս մասն, անպայման, այսօր վաղը կստանա կամ, միգուցե, արդեն ստացել է, բայց վստահությամբ ձեզ ասում եմ, որ դիպլոմ ստանալը չի նշանակում, որ դուք արդեն դարձել եք մանկավարժ: Մանկավարժի բարձր կոչմանն արժանանում են կամ այդ կոչումը վաստակում են տարիների քրտնաջան աշխատանքով, ինքնակրթությամբ եւ ինքնակատարելագործումով: Դուք ընդամենն այսօր իրավունք եք ստացել դպրոց մտնելու, դասարան մտնելու, բայց այդ կոչմանն արժանանալու ճանապարհին դուք պետք է շատ ջանք ներդնեք: Ասածս հետեւյալն էՙ ձեզ համար ավարտվել է ընդամենը ուսումնական այս շրջանը, այս փուլը, եւ դրանով ոչ թե ավարտվում, այլ միգուցե սկսվում է ուսումնառության ամենատեւական փուլը: Մարդ ողջ կյանքի ընթացքում պետք է սովորի, պետք է գիտելիք ձեռք բերի, հակառակ պարագայումՙ այդ մարդը չի կարող գոհ լինել կյանքից, այդ մարդը չի կարող հաշտ լինել ինքն իր հետ, չի կարող շատ մեծ օգուտ տալ հասարակությանը: Բոլորդ գիտեք, որ մեր ժողովրդի մեծերըՙ սկսած Մեսրոպ Մաշտոցից մինչեւ Խաչատուր Աբովյան, եղել են կա՛մ ուսուցիչներ, կա՛մ ուսուցչապետեր: Նույնիսկ այն մեծերը, ովքեր անձամբ չեն դասավանդել, սերունդների համար եղել եւ կոչվել են ուսուցիչներ: Ձեր մասնագիտության պատասխանատվության սահմանները չափազանց ընդգրկուն են: Խնդրում եմ սա եւս հաշվի առնել: Վաղը, երբ դուք մտնեք դասարան եւ հանդիպեք տասնյակ զույգ աչքերի, որոնք լցված են հետաքրքրասիրությամբ, հիշեք, որ այդ երեխաները իրենց ծնողների, իրենց Հայաստան երկրի համար ամենաթանկ գանձերն են, եւ հիշեք, որ այդ աչքերով ձեզ է նայելու վաղվա Հայաստանը:
Այսօր այստեղ առաջին անգամ ուզում եմ հրապարակավ հնչեցնել, որ Հայաստանի իշխանությունները կրթության ոլորտում իրականացվող քաղաքականության շրջանակներում նախապատրաստել են եւ ուսումնական տարվա սկզբին, այսինքն` ամռան վերջին, մենք հանդես կգանք մի մեծ ու կարեւոր, պետության համար ծախսատար ծրագրով: Բոլոր նրանք, ովքեր ակտիվ մասնակցություն կունենան այդ ծրագրի իրականացմանը, կլինեն պետության եւ հասարակության ուշադրության կիզակետում: Չեմ ուզում ավելի հանգամանորեն խոսել այս ծրագրի մասին, որով հետեւ մենք վերջին պայմանավորվածություններն ենք ձեռք բերում, վերջին շտրիխներն ենք ավելացնում եւ ամռան վերջին հանգամանորեն կխոսենք այդ ծրագրի մասին:
Սա ձեզ համար հնարավորություն է, լավ հեռանկարՙ աշխատելու սիրած մասնագիտությամբ եւ կայանալու:
Բոլորիդ հաջողություն եմ մաղթում, մեկ անգամ եւս շնորհավորում եմ ուսումնական այս շրջանն ավարտելու կապակցությամբ, ցանկանում եմ ձեզ անձնական երջանկություն ու նաեւ մասնագիտական հաջողություններ: Եվ մեկ անգամ եւս հիշեքՙ ձեր այդ հաջողություններից է կախված Հայաստանի ապագան»,-շրջանավարտներին ուղղված շնորհավորական խոսքում ասաց նախագահ Սերժ Սարգսյանը:
Միջոցառման ավարտին համալսարանի ռեկտոր Ռուբեն Միրզախանյանը հանրապետության նախագահին հանձնեց Խաչատուր Աբովյանի անվան մեդալը: Այն գերատեսչական ամենահին մեդալն է Հայաստանում եւ ունի 70 տարվա պատմություն:
