«Ես առաջադրվում եմ Միացյալ Նահանգների նախագահի պաշտոնում վերընտրվելու համար», – 2024 թվականի ընտրություններին երկրորդ ժամկետի համար առաջադրվելու մասին հայտարարել է 80-ամյա Ջո Բայդենը։
Փոխնախագահ Քամալա Հարիսը նույնպես հայտարարել է վերընտրվելու ծրագրերի մասին:
Հասարակական կարծիքի վերջին հարցումներն, ընդհանուր առմամբ, ցույց են տալիս, որ դեմոկրատների մեծ մասը պատրաստ է աջակցել Բայդենին, իսկ հանրապետականների մեծ մասը պատրաստ է աջակցել նախորդ նախագահ եւ հիմնական քաղաքական հակառակորդ Դոնալդ Թրամփին, եթե երկուսն էլ առաջադրվեն գլխավոր կուսակցությունների կողմից: Ընդ որում, հարցված ամերիկացիների մեծ մասը չի ցանկանում Սպիտակ տանը տեսնել ո՛չ պետության ներկայիս ղեկավարին, ո՛չ էլ Թրամփին։
Հիշեցնենք, որ ԱՄՆ հաջորդ նախագահական ընտրությունները նշանակված են 2024 թվականի նոյեմբերին։ Թրամփը 2022 թվականի նոյեմբերին արդեն հայտարարել էր երկրի բարձրագույն պետական պաշտոնի համար պայքարի մեկնարկի մասին։ Բայդենն, իր հերթին, մինչ օրս միայն ակնարկում էր, որ հույս ունի վերընտրվել։
