Ազգային ժողով այցելած Պաշտպանության փոխնախարար Արման Սահակյանից լրագրողներն այսօր փորձում էին Գորիսի Տեղ գյուղի դեպքերի հետ կապված մեկնաբանություն ստանալ։
Բայց իր գործելաոճի համաձայն՝ փոխնախարարը, ճեղքելով լրագրողների շուրջկալը, խուսափեց հստակ պատասխաններ տալ ու հեռացավ։ Լրագրողների կողմից անընդմեջ տրվող հիմնական հարցիը՝ ինչո՞ւ է հակառակորդն առաջացել, կամ ինչո՞ւ այդ առաջխաղացումը չի կասեցվել․ Սահակյանը նույն պատասխանն էր տալիս․«Հետևեք պաշտոնական լրահոսին»։
«Ճանապարհ տվեք՝ գնամ»․ անընդհատ կրկնում էր փոխնախարարը, ինչին ի պատասխան՝ լրագորղներից մեկն արձագանքեց․ «Արցախցիների ճանապարհը 100 օրից ավելի է՝ փակ է»։
Պաշտպանական գերատեսչության ոլորտի ներկայացուցիչը քանիցս ընդգծեց, որ լրագրողներն ինչքան էլ համառորեն պնդեն, որ մեկնաբանություն տա, ինքը դա չի անելու։ «Հետևեք պաշտոնական լրահոսին»,- երիցս հորդորեց լրագրողների կողմից «շրջափակման» մեջ հայտնված Սահակյանն ու խուսափելով հարցադրումներից՝ հեռացավ խորհրդարանից։
Ս․Վ․
