«Մենք հայտարարում ենք, որ Ադրբեջանը երբեք թույլ չի տվել իր տարածքն օգտագործել երրորդ պետությունների դեմ։
Վերջին շրջանում Իրանից հնչում են սպառնալիքներ Ադրբեջանի հասցեին, թույլ են տրվում սադրանքներ։ Օրինակները ներառում են Իրանի զորավարժությունները Ադրբեջանի հետ սահմանին, Իրանի պաշտոնյաների հակաադրբեջանական հայտարարությունները և Իրանում Ադրբեջանի դեսպանատան վրա կատարված ահաբեկչությունը: Նշենք, որ ըստ հետաքննության նախնական տվյալների՝ Միլլի Մեջլիսի պատգամավոր Ֆազիլ Մուստաֆայի դեմ կատարված ահաբեկչության հետքերը տանում են նաեւ Իրան»,-ասված է Ադրբեջանի ԱԳՆ-ի այսօրվա հաղորդագրության մեջ։
Հիշեցնենք, որ ադրբեջանցի պատգամավոր Ֆազիլ Մուստաֆայի դեմ մահափորձ է կատարվել։
Նա ողջ է մնացել, բայց նրա նկատմամբ տեղի ունեցած հարձակումը արագորեն որակվել է «ահաբեկչություն»։
Քննություն չի կատարվել, բայց ադրբեջանական կողմը շտապել է «մեղավորին» փնտրել Իրանում։ Ադրբեջանցի պատգամավորները եղածը որակել են ահաբեկչություն և բացի Իրանից, ենթադրյալ մեղավորի դերում կարգել նաև ԱՄՆ-ին ու Ֆրանսիային։
«Այսօր Իրան-Հայաստան եղբայրությունը շարունակում է սպառնալիք մնալ ողջ տարածաշրջանի համար։
Իրանի այս սպառնալիքները ոչ մի կերպ չեն կարող վախեցնել Ադրբեջանին։ Չնայած Իրանի տարածքից Հայաստան ուղարկված ռազմական աջակցությանը՝ ադրբեջանական բանակը ճնշել է Ադրբեջանի դեմ ուղղված ցանկացած ագրեսիա և սադրանք և այսուհետև էլ վճռականորեն կճնշի»,- ասված է հայտարարության մեջ։
