Հայաստանի նախագահի աշխատակազմի ներկայացուցիչները բազմիցս են տեղեկացնում, որ նախագահն անձամբ ծանոթանում է իրեն հասցեագրված բոլոր նամակներին, լինեն դրանք գրավոր, թե էլեկտրոնային, ՀՀ քաղաքացիներից, Հայաստանի բարեկամներից, թե` պարզապես օտարերկրացիներից:
Ապրիլի 18-ից որոշ ժամանակ առաջ, մի սովորական աշխատանքային օր, իտալացի Մարիո Մացոլան նամակ է գրում ՀՀ նախագահին: Այդ նամակով իտալական «Սիսկո» ընկերության զարգացման գծով նախագահ սենյոր Մացոլան եւ իր կինը` տիկին Կաբալետը պատրաստակամություն են հայտնում 1 մլն ԱՄՆ դոլար նվիրաբերել Հայաստանում Ամերիկյան համալսարանին: Բայց` ամեն ինչ հերթով:
ՎիվաՍել-ՄՏՍ ընկերության կողմից ֆինանսավորվող ՏՏ ոլորտում համաշխարհային ներդրման համար ՀՀ նախագահի ամենամյա մրցանակաբաշխության հաղթողներ են դարձել արդեն 5 հոգի: Առաջինն, ինչպես հիշում ենք, «Ինտել» կորպորացիայի տնօրենների խորհրդի նախկին նախագահ Քրեյգ Բարրեթն էր, ով 2010-ին, մրցանակը ստանալու համար տիկնոջ` Ֆինլանդիայում այսօր ԱՄՆ դեսպանի հետ այցելեց Երեւան եւ ՀՀ նախագահի ձեռքից ստացավ մրցանակը: Բարրեթը տիկնոջ հետ մի քանի օր անցկացրեց մեր երկրում, եղան նաեւ Ծիծեռնակաբերդում… Հաջորդ տարի երկրորդ մրցանակին արժանացավ «Էփլ Քոմփյութեր» կորպորացիայի համահիմնադիր Սթիվ Վոզնյակը: Նա եւս այցելեց Հայաստան, եղավ Ծիծեռնակաբերդում եւ անձամբ ստացավ մրցանակը:
2012-ի մրցանակակիրը Ֆեդերիկո Ֆաջինն է, որը «Սինապտիկս» ընկերության պատվավոր նախագահն է: Սենյոր Ֆաջին իր հերթին նույնպես Երեւանում ՀՀ նախագահից ստացավ իր մրցանակը եւ, իհարկե, այցելության ընթացքում եղավ նաեւ Ծիծեռնակաբերդում:
Չորրորդ մրցանակին արժանացել է կիսահաղորդիչային արդյունաբերության ասոցիացիայի նախագահ, կիսահաղորդիչային արդյունաբերության մասնագետների միության եւ «Թեքնո վիժն» ընկերության նախագահ, «Հիթաչի էլեկտրոնիկ դիվայսինգ գրուփ»-ի նախկին գլխավոր գործադիր տնօրեն եւ «Հիթաչի»-ի գլխավոր գործադիր տնօրեն Ցուգիո Մակիմոտոն: Ինչպես իր նախորդները, պարոն Մակիմոտոն եւս եղավ Երեւանում, Ծիծեռնակաբերդում…
Անցյալ տարի ՀՀ նախագահի հիշյալ մրցանակին է արժանացել մեզ արդեն ծանոթ Մարիո Մացոլան, ով, ի դեպ, իր իսկ խոսքերով` մինչ այդ ոչինչ չգիտեր Հայաստանի մասին:
Ապրիլի 18-ին Երեւանի Ամերիկյան համալսարանում տեղի ունեցավ ասուլիս` ՀՀ նախագահի աշխատակազմի ղեկավար Վիգեն Սարգսյանի, ՏՏ ոլորտում համաշխարհային ներդրման համար ՀՀ մրցանակի մրցանակաբաշխության գործադիր խորհրդի նախագահ Հովիկ Մուսայելյանի, ՎիվաՍել-ՄՏՍ ընկերության գլխավոր տնօրեն Ռալֆ Յիրիկայնի, «Վիասֆեր ինթերնեշնլ» ընկերության գործադիր նախագահ Թոնի Մորոյանի եւ Հայաստանի ամերիկյան համալսարանի նախագահ Արմէն Տէր Կիւրեղեանի մասնակցությամբ: Հովիկ Մուսայելյանը հայտնեց, որ մրցանակաբաշխության կազմկոմիտեն ակտիվ կապեր է պահպանում բոլոր հաղթողների հետ, հատկապես` պարոնայք Մակիմոտոյի եւ Մացոլայի, որոնց Հայաստան հրավիրելու գործին իր մեծ աջակցությունն է ցուցաբերել կազմկոմիտեի անդամ Թոնի Մորոյանը: Մուսայելյանը տեղեկացրեց նաեւ, որ Ցուգիո Մակիմոտոն այժմ ավարտում է Հայաստանի եւ Հայաստանում ՏՏ ոլորտի մասին իր գիրքը, որը շուտով կհրապարակվի ճապոներեն եւ ամենայն հավանականությամբ` արդեն Երեւանում կվերահրատարակվի հայերեն թարգմանությամբ: «Պարոն Մակիմոտոն շատ բան է անում Ճապոնիայում Հայաստանի ճանաչվածությունը մեծացնելու համար», շեշտեց Հովիկ Մուսայելյանը:
Իսկ Թոնի Մորոյանը հայտնեց Մացոլայի եւ նրա տինոջ կողմից Ամերիկյան համալսարանին նվիրաբերված 1մլն դոլարի մասին: Ամերիկյան համալսարանի նախագահ Տէր-Կիւրեղյանն իր հերթին պարզաբանեց, որ այդ գումարը կհամարվի համալսարանի դրամագլուխը, որից առաջացած տոկոսներով իրենք իրենց ուսանողներին թոշակ կտրամադրեն, ըստ համալսարանի նախագահի` ամեն տարի 20-30 ուսանողներ կկարողանան թոշակ ստանալ: Ի դեպ, մինչեւ հիմա Ամերիկյան համալսարանը դրամագլուխ չուներ, փաստորեն այժմ, ի տարբեություն բոլոր միլիոնատերերի, համալսարանը հանգիստ կարող է ասել, թե որտեղից է առաջացել իր առաջին միլիոնը:
Վիգեն Սարգսյանը խոսեց ՏՏ ոլորտի հանդեպ պետական ուշադրության մասին, հիշատակելով Երեւանում Սեմ Սիմոնյանի` «Թումո» կենտրոնը, որը, ըստ Սարգսյանի` շուտով կընդլայնի իր աշխարհագրությունը:
Իսկ ՎիվաՍել-ՄՏՍ-ի գլխավոր տնօրեն Ռալֆ Յիրիկյանը նշեց, որ կան բազմաթիվ ծրագրեր, որոնց կողքին կանգնած է իրենց ընկերությունը, բայց այս մեկը` նախագահի մրցանակաբաշխությունը, միանգամայն տարբերվում է, քանի որ սա հրաշալի միջոց է` Հայաստանի անունը աշխարհում խոշոր տառերով գրելու համար:
Եւ վերջում. ՏՏ ոլորտում համաշխարհային ներդրման համար ՀՀ նախագահից մրցանակ ստացած բոլոր` այս պահին դեռ 5 աշխարհահռչակ մարդիկ, իրենց Երեւան, կոնկրետ` Ծիծեռնակաբերդ այցելության ընթացքում, Հայոց ցեղասպանության հուշահամալիրում հիմնադրել են ծառերի արահետ. այս պահին այնտեղ 5 ծառ կա տնկված, դեռ հինգ…
Մրցանակաբաշխության այս տարվա թվով 6-րդ հաղթողի անունը հայտնի կլինի սեպտեմբերի վերջերին, եւ նա Հայաստան` մրցանակի հետեւից կժամանի արդեն նոյեմբերին:
