Մեծի տանն Կիլիկիո կաթողիկոսությունը դիմել է Թուրքիայի Սահմանադրական դատարան` պահանջելով թուրքական կառավարությունից հետ տալ Ցեղասպանության ժամանակ խլված Սիսի կաթողիկոսարանը եւ եկեղեցապատկան մյուս հողերը: Հայցի նախապատրաստման եւ ներկայացման գործում աջակից Լա Հեյի ատյանում ՄԱԿ-ի նախկին դատախազ Փայամ Ախավան հայտարարել է, որ սույն դատական նիստը ցույց կտա, թե որքա՞ն է հարգում Անկարան քրիստոնեա փոքրամասնությունների իրավունքները եւ հավելել, որ իրենց նպատակն է` «անցյալի վերքերը արդար քայլով դարմանելը, ինչպես նաեւ Հայաստանի եւ Թուրքիայի միջեւ հարաբերությունների բարելավմանը նպաստելը»:
Նկատենք,որ սա հայության մի հատվածի կողմից Թուրքիային դատի տալու աննախադեպ քայլ է, գուցե` մյուսների համար նախադեպ դարձող: Ի դեպ, ԱՄՆ կոնգրեսական Ադամ Շիֆը այս կապակցությամբ հայտարարել է` «Օսմանյան կայսրության կողմից կողոպտված այս հնագույն սրբավայրը գրեթե մեկ դար անց պետք է վերադարձվի իր օրինական տերերին: Հայերն իրավացի են` հետամուտ լինել բոլոր իրավական հնարավորություններին` ձեռք բերելու արդարությունն եւ ձգտելու նրան, ինչն իրավացիորեն իրենցն է»:
Էթիեն Մահչուպյանի փոխարեն` Աբդուլքադիր Օզքանը
Թուրքիայի վարչապետ Ահմեդ Դավութղօլուն աշխատանքից ազատված իր նախկին խորհրդական, հայազգի Էթիեն Մահչուպյանի փոխարեն նույն պաշտոնում նշանակել է Աբդուլքադիր Օզքանին, ով, ինչպես եւ Մահչուպյանը, մասս մեդիայի ոլորտում աշխատանքի փորձ ունի:
Հետաքրքրական է, որ Օզքանն ընդամենը 38 տարեկան է, ինչը նշանակում է, որ եթե թեկուզ մեկ տարի անց նա Հայոց ցեղասպանության մասին կարծիք հայտնելիս հայտարարի, որ «Այո, դա ցեղասպանություն էր», վարչապետ Դավութօղլուն չի կարող նրան ազատել աշխատանքից` «քանի որ վրա է հասել Օզքանի թոշակային տարիքը», ինչպես հիմնավորվեց Մահչուպյանի ազատման պարագայում:
Ո՞ւմ եք իրազեկում
Բեյրութում հրատարակվող «Ազդակ» թերթը տեղեկացնում է, որ ՀՅԴ Լիբանանի երիտասարդական միության անդամները, «շարունակելով Հայոց ցեղասպանության մասին իրազեկել ժողովրդին», անցած երեքշաբթի օրը Անթիլիասի եւ Մար Միխայելի շրջաններում սկավառակներ են բաժանել անցորդներին, որոնցում զետեղված են եղել Հայոց ցեղասպանությանը նվիրված երգեր` հայ եւ օտարազգի հայտնի կատարողների կատարմամբ: «Քարոզչական այս աշխատանքի նպատակը Հայ դատի աշխատանքը ներկայացնելն է ու լիբանանցիներին Հայոց ցեղասպանության մասին իրազեկելը: Սկավառակների տուփի վրա եղել է անմոռուկը, իսկ հետեւի մասում` Հայոց ցեղասպանության մասին արաբերեն ամփոփ տեղեկություն», գրում է «Ազդակը»:
Որ Լիբանանն ու լիբանանցիները Հայոց ցեղասպանության մասին իրազեկվելու կարիք ունեն, չգիտեինք, բայց որ, օրինակ, Իսպանիայում կամ Պորտուգալիայում դրա կարիքը կա, հաստատ գիտենք:
