Մետրոյի նոր կայարանի կառուցման իշխանական հայտարարություններն ընտրողների մոտ դրական սպասումներ առաջացնելու նպատակ ունեն. քաղտեխնոլոգ
Երևանի քաղաքապետի ընտրություններից առաջ մետրոյի նոր կայարան բացելու մասին իշխանության հայտարարություններն, իհարկե, PR հնարք են։ Դրանք ակնհայտորեն ընտրողների մոտ դրական սպասումներ առաջացնելու նպատակ ունեն։ Azg.am-ի թղթակցի հետ զրույցում նման տեսակետ հայտնեց քաղտեխնոլոգ Կարեն Քոչարյանը՝ անդրադառնալով կառավարության այսօրվա նիստում Երևանի փոխքաղաքապետ Տիգրան Ավինյանի այն հայտարարությանը, որ քննարկվում է «Փեթակ» տոնավաճառի տարածքում մետրոյի նոր կայարան կառուցելու հարցը։
Քաղտեխնոլոգի համոզմամբ՝ ամենևին պետք չէ թերագնահատել հայաստանյան ընտրազանգվածին՝ անկախ նրանից՝ երևանաբնակ, թե մարզաբնակ ընտրողների մասին է խոսքը։
«Այնքան մեծ հավատով լցված, ինչքան մեր ժողովուրդն է, այլ տեղ չեմ տեսել։ Մենք ամեն ինչին ենք հավատում։ Այսքանից հետո դեռ ռոմանտիկան մարդկանց մոտ չի մարել»,- ասաց Կարեն Քոչարյանը։
Հարցին՝ արդյոք «Փեթակ»-ի աշխատակիցների՝ աշխատանքից զրկվելու հեռանկարը և դրանից բխող բողոքի հնարավոր ալիքը չեն ազդի Ավինյանի վարկանիշի վրա, քաղտեխնոլոգը պատասխանեց՝ համոզված է, որ իշխանություններն ավելի ուշ կհայտարարեն՝ կայարանը կառուցվելու է ոչ թե տոնավաճառի տարածքում, այլ մերձակայքում։
«Կարծում եմ՝ «Մալաթիա» տոնավաճառը փակելու փորձից հետո իրենք մոտակա ժամանակները ռիսկի չեն գնա և գոնե մինչև քաղաքապետի ընտրությունները, ոչինչ չեն փակի։ Բայց եթե ուղիղ հայտարարվի, որ «Փեթակ» տոնավաճառը կփակվի, բնական է, որ մարդիկ կդժգոհեն։ Բայց իշխանությունն, իհարկե, չի ասի, որ շուկան կփակվի»,- ասաց Կարեն Քոչարյանը։
Քաղտեխնոլոգից նաև հետաքրրքվեցինք՝ ինչո՞ւ իր կարծիքով ընդդիմությունը մինչև այս պահը չունի քաղաքապետի իր թեկնածուն։
«Երևի կառաջադրի։ Ընդդիմությունը չի ուշանում, այդ ՔՊ-ն է շտապում։ Չի նշանակում, որ իշխանությունն օրենք է խախտում և նախընտրական կամպանիան սկսել է բավականին վաղ, ուրեմն բոլորը պետք է օրենք խախտեն։ Իսկ եթե ընդդիմությունն այդպես էլ քաղաքապետի իր թեկնածուին չհայտարարի, իր խնդիրն է։ Բայց ես վստահ եմ, որ թեկնածուներ կլինեն, ավելին՝ թեկնածուների պակաս չի լինի»,-նշեց մեր զրուցակիցը։
Հիշեցնենք, որ Երևանի քաղաքապետի ընտրությունները նախատեսված է անցկացնել այս տարվա աշնանը, սակայն Azg.am-ի տեղեկություններով՝ ընտրությունը կարող է կայանալ ավելի վաղ՝ հունիսի 2-ին։
