Ադրբեջանը պետք է անվերապահորեն կատարի Արդարադատության միջազգային դատարանի որոշումը, բայց դժվար թե կատարի. Դավիթ Բաբայան

ՄԱԿ-ի Արդարադատության միջազգային դատարանի երեկվա որոշումը՝ պարտավորեցնելու Ադրբեջանին բացել Լաչինի միջանցքը, շատ կարևոր է։ Մեր թիմը՝ իրավաբանները և դիվանագիտական կորպուսը, շատ լավ է աշխատել, Azg.am-ի թղթակցի հետ զրույցում ասաց Արցախի Հնարապետության նախագահի խորհրդական, հատուկ հանձնարարություններով ներկայացուցիչ Դավիթ Բաբայանը։
«Լավ է, որ նման պարտավորեցում կա։ Լավ է նաև, որ Ադրբեջանի հայցը մերժվել է (Արդարադատության միջազգային դատարանը միաձայն մերժել էր Հայաստանի նկատմամբ ժամանակավոր միջոցներ կիրառելու մասին Ադրբեջանի պահանջը՝ խմբ.)։
Սակայն գործընթացը, կարծես թե, մի փոքր թերի է, որովհետև այնտեղ նախևառաջ գազի խնդիրն է շատ վիճահարույց. չի ընդգծվում, որ Ադրբեջանը պարբերաբար արգելափակում է գազի մուտքն Արցախ։ Սա իսկապես աբսուրդ է. ինչպե՞ս կարող է նման բան լինի և այդ մասին չնշվի։
Եվ երկրորդ, նշված չէ, որ այսպես կոչված «էկոակտիվիստների» գործողություններն ադրբեջանական պետությունն է ուղղորդում և կազմակերպում։ Սա ինչ-որ տեղ ինդուլգենցիայի պես բան է, բայց ինդուլգենցիան ստանում են այն ժամանակ, երբ զղջում կա։ Իսկ Ադրբեջանի պարագայում նույնիսկ զղջում չկա»,- ասաց մեր զրուցակիցը։
Դավիթ Բաբայանի համոզմամբ՝ Ադրբեջանը չպետք է որևէ հնարավորություն ունենա վիճարկելու Հաագայի դատարանի որոշումը։
«Հուսով ենք, որ անպայման պետք է շարունակություն լինի, և ամեն ինչ արվի, որպեսզի Ադրբեջանը պատասխանատվության ենթարկվի։ Այդ երկիրն անվերապահորեն պետք է կատարի Արդարադատության միջազգային դատարանի որոշումը, բայց դժվար թե կատարի։ Սա է խնդիրը. որովհետև բազմաթիվ նմանօրինակ միջազգային որոշումներ կան, որոնք Ադրբեջանն առ այսօր չի իրականացրել»,- նշեց արցախցի պաշտոնյան։
Հիշեցնենք, որ Արդարադատության միջազգային դատարանը որոշել է՝ Բաքուն պարտավոր է ռասայական խտրականության բոլոր ձևերի վերացման մասին միջազգային կոնվենցիայով ստանձնած պարտավորություններին համապատասխան, ձեռնարկել բոլոր միջոցները՝ ապահովելու Լաչինի միջանցքով մարդկանց, տրանսպորտային միջոցների և բեռների անխափան երթևեկությունն ու տեղաշարժը։
Հարցին՝ ինչ կարող է հետևել, եթե Ադրբեջանը հրաժարվի կատարել Հաագայի դատարանի որոշումը, միջազգային հարցերով ՀՀ ներկայացուցիչ Եղիշե Կիրակոսյանը պարզաբանել էր՝ նախ դա լավ արձագանք չի ունենա միջազգային հանրության կողմից։
«Ադրբեջանի կողմից նման որոշումների չկատարումն առաջացնելու է առնվազն երկրի հեղինակության խնդիր, նաև լուրջ բարդություններ։ Հայկական կողմն էլ պետք է ամեն ինչ անի՝ ադրբեջանական կողմին և միջազգային հանրությանն անընդհատ հիշեցնելու այս նոր պարտավորության մասին և, այդ դեպքում, չեմ կարծում, թե ադրբեջանական կողմի շահերից է բխում այս որոշումը չկատարելը»,- նշել էր Կիրակոսյանը։