ԱԼԻԵՎ «ՂԱՐԱԲԱՂՅԱՆ ՀԱԿԱՄԱՐՏՈՒԹՅԱՆ ԼՈՒԾՄԱՆ ԱՄԵՆԱՄԵԾ ԱՐԳԵԼՔԸՙ ՀԱՅԿԱԿԱՆ ԼՈԲԲԻՆ Է»

ԱՆԱՀԻՏ ՀՈՎՍԵՓՅԱՆ, Գերմանիա

Եթե Հայաստանն իր հզոր աջակիցներից պաշտպանություն չգտներ, ԼՂ հակամարտությունը վաղուց իր արդարացի վճիռը կունենար: Հայաստանը չէր կարող առանց օտար օգնության Ադրբեջանին դիմակայել, ըստ «Ազերթաջ» գործակալության նոյեմբերի 25-ին գերմաներեն տարածած հաղորդագրության ասել է Ադրբեջանի նախագահը Բաքվումՙ Ազգային ժողովի հինգերորդ գումարման առաջին նիստի ժամանակ իր ելույթում: «Այսօր Ադրբեջանը Հայաստանից մի քանի անգամ ուժեղ է, բայց ճիշտ է նաեւ, որ տարբեր երկրներում գործող հայկական լոբբին եւ հայկական կազմակերպությունները իրենց դերն ունեն տվյալ երկրների կառավարությունների վրա ազդեցություն բանեցնելու հարցում: Այս գործոնն է ղարաբաղյան հակամարտության լուծման ամենամեծ արգելքը, մեկնաբանել է Իլհամ Ալիեւը եւ հավելելՙ Հայաստանը չի կարող միջազգային իրավունքն այսպես կոպիտ ոտնահարել, Ադրբեջանը շարունակելու է իր ուղին: Որեւէ երկիր չի ճանաչում «այսպես կոչված Լեռնային Ղարաբաղ կառույցը» (Berg-Karbach-Struktur) եւ չի ճանաչելու: Սա մենք երբեւէ թույլ չենք տալու եւ այդ ուղղությամբ մեր դիվանագիտական, քաղաքական ջանքերն ուժեղացնելու ենք: Միաժամանակ շարունակելու ենք ամրապնդել մեր ռազմական ներուժը, վերջին տարիներին մեծ հաջողություններ ենք գրանցել այս ոլորտում: Մեր բանակի մարտունակությունն օր օրի ավելի է հզորանումՙ հագենում արդի զինատեսակներով, ադրբեջանական բանակն այսօր աշխարհում համարվում է ուժեղագույններից մեկը: Այս գործընթացը շարունակվում է, Ադրբեջանի նախագահի խոսքերն է փոխանցում «Ազերթաջ» պետական լրատվական գործակալությունը: