Թուրքական լիրան դոլարի նկատմամբ ընկավ ռեկորդային ցածր մակարդակի այն բանից հետո, երբ երկիրը հայտնվեց հերթական տարածաշրջանային հակամարտության մեջ, այս անգամ՝ Ադրբեջանի ու Հայաստանի միջև, հաղորդում է թուրքական Ahval թերթը:
Երկուշաբթի լիրան իջավ՝ հասնելով 1 դոլարի դիմաց 7,8-ի։
Թուրքիան նախօրեին բռնկված ղարաբաղյան հակամարտության գոտում Հայաստանի հետ բախումներից առաջ Ադրբեջանում ռազմական տեխնիկա է տեղակայել, այդ թվում՝ F-16 կործանիչներ, նշում է թերթը:
«Մտավախություններ կան, որ քանի որ Թուրքիայի տնտեսությունը ծնկի է իջել, իսկ Անկարան ակտիվորեն մասնակցում է հակամարտությունների սրմանը Սիրիայի հյուսիսում ու Հունաստանի հետ՝ Միջերկրական ծովում, երկիրը կարող է ներքաշվել տարածաշրջանային մեկ այլ հակամարտության մեջ, որը չի կարող իրեն թույլ տալ ո՛չ քաղաքական, ո՛չ տնտեսական տեսանկյունից», ասում է Սինգապուրի Oanda առցանց բրոքերի ավագ վերլուծաբան Ջեֆրի Հելլին, հաղորդում է Bloomberg-ը:
