Երբ Նիկոլ Փաշինյանը կառավարության նիստում հայտարարում է, որ Ադրբեջանը կարող է մի քանի օրով բացել Լաչինի միջանցքը՝ թույլ տալու արցախահայերին զանգվածաբար լքել իրենց տները, պարզ է դառնում, որ Փաշինյանը և Ալիևը գործում են տանդեմով, Azg.am-ի թղթակցի հետ զրույցում ասաց քաղաքագետ Գագիկ Համբարյանը։
«Չի բացառվում, որ իրենք Արցախը հայաթափելու համատեղ ծրագիր ունեն, և կառավարության նիստի ժամանակ Փաշինյանի անկեղծությունը դրա վառ ապացույցն է։ Ինքն արցախահայությանը շատ պարզ հասկացնում է՝ ովքեր կպաչեն թուրքի աջը, կմնան և կապրեն Արցախում՝ իհարկե որպես Ադրբեջանի քաղաքացիներ, ովքեր ոչ՝ Ալիևը նրանց շանս է տալիս դուրս գալու իրենց տներից»,- ասաց մեր զւրուցակիցը։
Գագիկ Համբարյանի խոսքով՝ Փաշինյանն արցախահայությանը փրկության այլ տարբերակ չի առաջարկում՝ դրանով իսկ կրկին փաստելով, որ շատ վաղուց է ձեռքերը լվացել Արցախից։
«Եթե ուշադիր լինենք, կնկատենք, որ Փաշինյանի և Ալիևի բառամթերքն անգամ նույնն է։ Նրանք երկուսն էլ փորձում են խաղից դուրս թողնել ԵԱՀԿ Մինսկի խմբի համանախագահ երկրներին՝ հատկապես Ռուսաստանին, և ԼՂ հարցը լուծել Ադրբեջանի տարածքային ամբողջականության սկզբունքի հիման վրա։ Փաշինյանը չի էլ թաքցնում, որ Արցախը ճանաչում է որպես Ադրբեջանի մաս։
Այժմ պլան Բ-ն է իրագործվում, որով փորձ է կատարվում կամ Արցախը հայաթափել և այդպես թուրքերին տալ կամ Արցախն արցախահայության հետ միասին թուրքերին տալ»,- ասաց քաղաքագետը։
Հիշեցնենք՝ գործադիրի երեկվա նիստում Փաշինյանը հայտարարել էր, որ իր ունեցած տեղեկություններով՝ Բաքվի պլանը հետևյալն է՝ Լեռնային Ղարաբաղում տնտեսական, հոգեբանական ճնշումը հասցնել կուլմինացիոն կետի, դրանից հետո մի քանի օրով բացել միջանցքը՝ ակնկալիքով, որ արցախահայերը զանգվածաբար կլքեն իրենց տները, կրկին փակել միջանցքը ու հետո կրկին մի քանի օրով բացել ու այդպես այնքան, մինչև վերջին հայը կլքի Լեռնային Ղարաբաղը։
