Մինչ Հայաստանում շատ ակտիվորեն քննարկվում է, թե ինչո՞ւ դպրոցական ավարտական վկայականների մեջ նաեւ ռուսերեն պետք է գրված լինի, երկրի բուհերում տեղի ունեցան ընդունելության քննություններ: Եւ մինչ կասեմ, թե ինչո՞ւ է այդ վկայականների մեջ տեղ գտել ռուսերենը, խոսենք քննություններից:
Այսպես, աշխարհագրություն առարկայից լրացուցիչ փուլում քննություն է հանձնել 14 դիմորդ` հայտագրված 22-ից: Միջին միավորը կազմել է 9.8, անբավարար ստացել է քննություն հանձնածների 28.6 տոկոսը: Ամենաբարձր գնահատականը եղել է 19.5-ը: Այդքան միավոր ստացել է 1 դիմորդ:
Հայոց պատմություն առարկայից միասնական քննություն հանձնելու համար հայտագրվել է 91 դիմորդ, ներկայացել` 73-ը: Միջին միավորը 11.6 է, անբավարար գնահատական ստացել է դիմորդների 30 տոկոսը: Առավելագույն` 19.75 միավոր ստացել է 1 դիմորդ:
Քիմիա առարկայից լրացուցիչ փուլում քննություն հանձնելու համար դիմել է 149 հոգի, քննությանը մասնակցել է 137-ը: Այս առարկայի միջին միավորը 10.04 է, անբավարար գնահատականները կազմում են 41 տոկոս: Հնարավոր առավելագույն` 20 միավոր ստացել է 2 դիմորդ:
Ֆիզիկայի միասնական քննություն հանձնելու համար հայտագրվել է 134 դիմորդ, ներկայացել 129-ը: Միջին միավորը 9-ն է: Անբավարար գնահատականները կազմում են 48 տոկոս, 20 միավոր ստացել է 3 դիմորդ:
Իսկ ամենաուշագրավ պատկերը արձանագրվել է Համաշխարհային պատմություն առարկայի քննությանը: Մասնակցել է ընդամենը երկու դիմորդ: Նրանցից մեկը ստացել է անբավարար գնահատական, մյուսը` 13 միավոր:
Այս արդյունքների հիման վրա դիմորդներն ընդունվել են: Օրինակ ԵՊՀ Ժուռնալիստիկայի ֆակուլտետում այս տարի պատկերը հետեւյալն է. անցողիկ միավորը 29.50 բալ է, անվճարըՙ 56.25: Սա նշանակում է, որ եթե բոլոր քննություններից դիմորդը հավաքել է 29,50 բալ, այսինքն ամեն քննությունից միջինը տասը բալ, ապա նա կարող է դառնալ լրագրող: Նույն տրամաբանությամբ, կրկին ԵՊՀ-ի Տնտեսագիտության եւ կառավարման ֆակուլտետի տնտեսագիտության տեսություն բաժնումՙ անվճար 55.50 բալ, անցողիկՙ 25.50: Ինֆորմատիկայի եւ կիրառական մաթեմատիկա բաժնում այս տարի անցողիկ միավորը 24-ն էՙ 2 քննության արդյունքներով, անվճարըՙ 38.50-ը: Հայ բանասիրության ֆակուլտետ. անցողիկըՙ 16 բալՙ 2 քննությամբ, անվճարՙ 35.25 բալ: Այստեղ մանրամասնեմ, ստացվում է, որ եթե դիմորդը, ով ցանկանում է բանասեր դառնալ, երկու քննություններից ստանում է 8-ական բալ, ինչը նվազագույն բալն է, որպեսզի չկտրվես, ապա նա համալրում է բանասիրական ֆակուլտետի ուսանողների խումբը եւ շուտով դառնալու է հայոց լեզվի եւ գրականության մասնագետ, դատելով ամենիցՙ մեծ մասնագետ: Ինչպես, օրինակ, ԵՊՀ Քիմիայի ֆակուլտետի շրջանավարտներն են դառնալու մեծ քիմիկոսներ: Ի դեպ Քիմիայի ֆակուլտետում տեղերը թափուր են մնացել: Այստեղ անվճարը 37 բալն է:
Պատմության ֆակուլտետում անցողիկ բալն այս տարի 16-ն էՙ 2 քննությամբ, անվճարըՙ 32.50: Արեւելագիտության ֆակուլտետի արաբագիտություն բաժնում անցողիկ միավորը 30-ն է, անվճարըՙ 52.50, Իրանագիտության բաժնում անցողիկը կրկին 30-ն է, անվճարըՙ 54.75-ը:
Հիմա, հաշվի առնելով քննությունների ժամանակ մեր դիմորդների ցուցաբերած բարձրագույն առաջադիմությունը, ունենք հետեւյալ պատկերը Երեւանի պետական համալսարանում .
Ֆիզիկայի 50 տեղից համալրվել է 47-ը:
Կենսաֆիզիկա եւ կենսաինֆորմատիկա բաժնի 33 տեղից համալրվել է 30-ը: Սերվիս ֆակուլտետը, որը բացելիս խոսվում էր մեծ պահանջարկի մասին, մանավանդ հաշվի առնելով այն հանգամանքը, որ Հայաստանը տարածաշրջանի եւ ամբողջ աշխարհի զբոսաշրջության կենտրոններից մեկն է, 125 տեղերից համալրվել է 55-ը:
Տնտեսագիտության ֆակուլտետի 130 տեղերից էլՙ 80-ը:
Դե իսկ հայոց լեզու եւ գրականությունը ավելի ու ավելի քչերին են հետաքրքրում, քանի որ `120-ից 31 տեղն է համալրվել:
Ի դեպ, ռուսաց լեզու ֆակուլտետի 40 տեղից 40-ն էլ համալրված են: Իսկ այ անգլերեն լեզու եւ գրականություն բաժնի 135 տեղից համալրվել է` 52-ը:
Փոխարենը հրաշալի արդյունք է ցույց տվել եկեղեցաբանություն բաժինը, որի 25 տեղերից բոլորն էլ համալրված են: Ամեն:
Համալրված են նաեւ միջազգային հարաբերությունների եւ իրավագիտության ֆակուլտետները:
Այլ բուհերում, օրինակՙ Հայաստանի պետական տնտեսագիտական համալսարանի հաշվապահական հաշվառում եւ հարկում (ըստ ոլորտի) բաժնի` 25 տեղ է համալրվել` 190-ից:
Խ. Աբովյանի անվան հայկական պետական մանկավարժական համալսարանի պատմություն ֆակուլտետում` 51 տեղ` 85-ից:
Երեւանի Վ. Բրյուսովի անվան պետական լեզվահասարակագիտական համալսարանի անգլերեն լեզու եւ գրականություն` 99 տեղ`153-ից: Ի դեպ, հետաքրքրական է, որ գերմաներեն լեզու եւ գրականություն բաժնի 49 տեղից 49-ն էլ համալրվել է: Այս բուհը նաեւ ապագա լրագրողների խնդիրն է լուծել, քանի որ լրագրություն բաժնի 34 տեղից 34-ն էլ համալրված են: Իմիջիայլոց ամեն տարի 34 լրագրողը բավարա՞ր է, թե ավելի շատ է պետք…
Այս ամենի կապակցությամբ Գնահատման եւ թեստավորման կենտրոնի տնօրեն Արա Իսպիրյանը հայտնել է, որ թափուր տեղերի մրցույթին մասնակցելու համար դիմորդները կարող են տվյալ բուհում հայտագրվել մինչեւ հուլիսի 20-ը: Հուլիսի 20-25-ը կանցկացվի թափուր տեղերի մրցույթ, եւ արդեն հուլիսի 25-ին բուհերում կհրապարակվեն նոր մրցույթի արդյունքները:
Թափուր տեղերն իհարկե կհամալրվեն, կամՙ ոչ: Մեկ այլ կարեւոր բան կա. 2003-ին Հայաստանում ծնվել են ամենաքիչ թվով երեխաները, իսկ սա նշանակում է, որ մոտակա երեք տարիներին, առնվազն, հայաստանյան բուհերում թափուր տեղեր են լինելու, քանի որ դիմորդներն են քիչ լինելու: Սաՙ հարցի մի կողմը: Մյուսըՙ դպրոցում է, որտեղ 12 տարի սովորելուց հետո դիմորդը գնում է քննության եւ, օրինակ, Հայոց պատմությունից ստանում է անբավարար, այն պարագայում, երբ ինքը որոշել է պատմաբան դառնալ եւ իր հարազատ քեռու կինը նրա Հայոց պատմության ուսուցչուհին է եղել:
Չմոռանամ ավարտական վկայականներում հայտնված եւ Հայաստանում, ինչպես վերեւում համոզվեցինք, շատ մեծ պահանջարկ ունեցող ռուսերենի մասին: Ինչպես գիտենք, մենք ԵԱՏՄ անդամ երկիր ենք, որի մեծ մասը խոսում է ռուսերեն, ավելի մեծ մասըՙ նաեւ հասկանում է, ճնշող մեծամասնությունն էլՙ միայն ռուսերեն է հասկանում: Եւ ուրեմն, բա ի՞նչ լեզու պետք է մտնի մեր վկայականների մեջ, մեր կյանք, եթե ոչ ռուսերենը: Գուցե դուք ղազախերենի՞ կողմնակիցն եք…
Ամեն դեպքում մտածել է պետք, ցանկալի է դպրոցից:
