Սոչիում հոլտեմբերի 31-ին կայանալիք եռակողմ հանդիպման ժամանակ հայկական կողմի օրակարգն այն իրադարձությունների պարզաբանումն է, որոնք տեղի են ունեցել վերջին մեկ տարվա ընթացքում, մասնավորապես՝ ադրբեջանական վերջին ագրեսիան, դրա հետևանքների շուրջ խոսակցությունները, ինչպես նաև՝ եռակողմ հայտարարությունների կատարման ընթացքի վերլուծությունը, այս մասին խորհրդարանական ճեպազրույցի ժամանակ հայտարարեցին իշխող խմբակցության պատգամավորները.
«Մեկ տարի է անցել նման ֆորմատով հանդիպումից, կարծում եմ, ժամացույցներն ուղղելու անհրաժեշտություն կա»,-ասաց ՔՊ խմբակցության պատգամավոր Սարգիս Խանդանյանը:
Լրագրողի հարցին՝ արդյո՞ք ադրբեջանական զորքերի դուրսբերումը ՀՀ ինքնիշխան տարածքից նախայման է լինելու, Անդրանիկ Քոչարյանն արձագանքեց՝ զորքերի դուրսբերումը ոչ թե պահանջ է, այլ՝ անհրաժեշտություն.
«Անկախ նրանից՝ բանակցություններն ինչ ընթացք կստանան, այն, ինչ պատկանում է ՀՀ-ին, դա քննարկման նյութ չէ, մեր ինքնիշխան տարածքում որևէ օտար զինվորի ներկայությունը չի հանդուրժվելու, նրանք պետք է խաղաղ պայմաններում դուրս գան մեր տարածքից, մնացած բոլոր պայմաններում դա պահպանելու է լարվածությունը մեր սահմանին»,-ասաց նա:
Աղբյուր` Փաստինֆո
