Կառավարության այսօրվա նիստում որոշվեց 5 տարով երկարացնել հանրակրթական դպրոցների սեյսմիկ անվտանգության բարելավման ծրագրի գործողության ժամկետը՝ 2030-ի փոխարեն վերջնաժամկետ սահմանելով 2035 թվականը։
Ծրագիրը երկարաձգելու պատճառը, ինչպես նշված է նախագծի հիմնավորման մեջ, այն է, որ 2015 -2022 թվականներին իրականացվել են շուրջ 63 դպրոցների կառուցման, վերակառուցման ու հիմնանորոգման աշխատանքներ, ընդ որում որոշները դեռևս ընթացքի մեջ են, ուստի հետագա 8 տարում շուրջ 305 դպրոցների սեյսմիկ անվտանգության բարելավման կանխատեսումը գնահատվում է ոչ իրատեսական։
Նախագծով առաջարկվում է հստակեցնել ՀՀ պետական հանրակրթական դպրոցների սեյսմիկ անվտանգության բարելավման ծրագրում ընդգրկված՝ սեյսմիկ տեսանկյունից առավել վտանգավոր առկա դպրոցների ցանկը, ինչպես նաև ծրագրում ընդգրկվող դպրոցները, համայնքները և բնակավայրերը՝ հաշվի առնելով համայնքների միավորման գործընթացը։
«Սեյսմիկ անվտանգության բարելավման ծրագրում ընդգրկված դպրոցների թիվը 368 է։ Ընդ որում, դպրոցների հստակեցման արդյունքում գործող որոշմամբ ներակայացված են դպրոցներ, որոնք այժմ չենք գործում։ Այդ իսկ պատճառով 437 դպրոցի և տարբեր ֆինանսավորման աղբյուրների հաշվին իրականացված և իրականացվող կառուցվող կամ հիմնանորոգվող դպրոցների թվի տարբերությունը չի համապատասխանում»,-նշված է նախագծի հիմնավորման մեջ։
Հիմնավորման համաձայն՝ ծրագրի շարունակության ապահովման համար անհրաժեշտություն է առաջացել լրացուցիչ ֆինանսական միջոցների, քանի որ ի սկզբանե ծրագրում անհրաժեշտ ֆինանսական միջոցների նախատեսման հիմքում դրված է եղել այն հանգամանքը, որ որոշակի թվով դպրոցներ պետք է կառուցվեին, իսկ որոշակի թվով դպրոցներ՝ ամրացվեին:
Հիմնավորման մեջ նաև նշվում է, որ ամրացումը ենթադրում էր ֆինանսական միջոցների ավելի քիչ ծախս, հետևաբար ակնկալվում էր, որ նախատեսված միջոցները կբավարարեն 46 դպրոցների կառուցման կամ ամրացման համար: Սակայն հաշվի առնելով ծրագրում ընդգրկված դպրոցական շենքերի տեխնիկական վիճակի վերաբերյալ մասնագիտական կառույցների կողմից ներկայացված փորձաքննությունների եզրակացությունների արդյունքները, ծրագրով նախատեսված դպրոցական շենքերը քանդվել և նորերն են կառուցվել՝ բացառությամբ մեկ դպրոցի:
«63 դպրոցների շինարարության աշխատանքների արժեքը կազմել է 71,765 մլրդ դրամ կամ շուրջ 159,5 մլն ԱՄՆ դոլար, իսկ ծրագրում ընդգրկվող 368 դպրոցների կառուցման կամ վերակառուցման արժեքը՝ ըստ խոշորացած հաշվարկների և հիմք ընդունելով ԱԶԲ-ի աջակցությամբ իրականացվող Ծրագրի շրջանակներում կառուցվող դպրոցների նախահաշվային արժեքները՝ շուրջ 1,678 մլրդ ԱՄՆ դոլար։ Այսինքն, 2022-30 թվականները անհրաժեշտ կլինի 1,519 մլրդ ԱՄՆ դոլար։ Այդ կապակցությամբ առաջարկվում է ծրագրի գործողության ժամկետը երկարացնել մինչև 2035 թվական»,-ասված է հիմնավորման մեջ։
Աղբյուր` Փաստինֆո
