Այսօր լրացավ Եռաբլուրի գրավման օպերացիայի մեկ ամիսը. գրել է փաստաբան Հովհաննես Խուդոյանը։
Նա անդրադարձել է սեպտեմբերի 21-ին, Եռաբլուրում տեղի ունեցած դեպքերին, երբ ոստիկանները, բռնի ուժ կիրառելով, բերման էին ենթարկում Նիկոլ Փաշինյանի մուտքը Եռաբլուր թույլ չտվող սևազգեստ ծնողներին։
«Այս նկարներում պատկերված ոստիկանները անձամբ ծնողներին չեն կպել ու երևի կարծում են, որ իրենք ոչ մի կապ չունեն այդ անբարոյականության հետ:
Բայց դա իրենց միայն թվում է, քանի որ նույնքան անբարոյական է այն մարդը, ով անհաղորդ հայացքով հետևում է, թե ինչպես են իր գործընկերները քաշքշում ու ասֆալտին գցում զոհվածների ծնողներին ու ոչինչ չի ձեռնարկում, հակառակը, իր ներկայությամբ օժանդակում այդ «միջոցառման» անցկացմանը:
Եթե ճանաչում եք որևէ մեկին, խնդրում եմ տվյալներ փոխանցել: Դեռ առիթ կլինի իրենց երեսին ասել, թե իրենք ով են»,- նշել է փաստաբանը:
