Փաստաբան Էրիկ Ալեքսանյանը չի կալանավորվել, որոշումը չի հրապարակվել, ապատեղեկատվություն է տարածվում: Այս մասին ֆեյսբուքյան իր էջում գրել է փաստաբան Զորայր Հարությունյանը։
«Նմանօրինակ ստերի տարածումը գնահատում ենք որոշ ուժերի կողմից ուղղորդված ճնշման փորձ Երեւան քաղաքի դատարանի հանդեպ»,- գրել է նա։
Ինչպես հայտնի է, երկու օր առաջ Ազգային անվտանգության ծառայության աշխատակիցները Երեւանի ընդհանուր իրավասության դատարանի Աջափնյակի նստավայրից բերման էին ենթարկել փաստաբան Էրիկ Ալեքսանյանին։ Հանրային հնչեղություն ունեցող քրեական վարույթներով պաշտպան հանդիսացող փաստաբանը մեղադրվում է պաշտոնատար անձի կողմից լիազորությունները չարաշահելուն օժանդակելու մեջ։ Վարույթով մեղադրյալի կարգավիճակ ունի Աջափնյակի նստավայրի դատավոր Արուսյակ Ալեքսանյանը, որին ԲԴԽ-ն զրկել է անձեռնմխելիությունից, նա այսօր կալանավորվել է։
