2022թ. սեպտեմբերի 19-23-ը Ծաղկաձորում անցկացվեց « Մաթեմատիկական անալիզ եւ դիֆերենցիալ հավասարումներ» թեմայով միջազգային գիտաժողովը: Այն կազմակերպել էին ՀՀ Կրթության, գիտության, մշակույթի եւ սպորտի նախարարության գիտության կոմիտեն, ՀՀ Գիտությունների ազգային ակադեմիայի Մաթեմատիկայի ինստիտուտը, Երեւանի պետական համալսարանը, Ռուսաստանի Դաշնության Կրասնոյարսկի տարածաշրջանային գիտակրթական մաթեմատիկական կենտրոնը եւ Հարավային դաշնային համալսարանի տարածաշրջանային գիտակրթական մաթեմատիկական կենտրոնը:
Գիտաժողովի նիստերի եւ «Մաթեմատիկական անալիզ» եւ «Դիֆերենցիալ հավասարումներ» սեկցիաների ընթացքում Գերմանիայի Բրեմենի համալսարանի, Փարիզ-Էստ Մարն-լա-Վալե համալսարանի, Պորտուգալիայի Ավեյրոյի համալսարանի, Բելգիայի Գենտի համալսարանի, Ռուսաստանի գիտությունների ակադեմիայի (ՌԳԱ) Ստեկլովի անվան մաթեմատիկական ինստիտուտի, ՌԳԱ Կելդիշի անվան կիրառական մաթեմատիկայի ինստիտուտի, ՌԳԱ Մարչուկի անվան հաշվողական մաթեմատիկայի ինստիտուտի, ՌԳԱ Համալիր գիտահետազոտական ինստիտուտի, Սոբոլեւի անվան մաթեմատիկայի ինստիտուտի, Հարավային դաշնային համալսարանի, Սիբիրի դաշնային համալսարանի, Լեոնարդ Էյլերի անվան միջազգային մաթեմատիկական ինստիտուտի, Ռուսական պետական հումանիտար համալսարանի, Մոսկվայի Լոմոնոսովի անվան պետական համալսարանի, Սանկտ Պետերբուրգի պետական համալսարանի, Կազանի դաշնային համալսարանի, Յարոսլավլի պետական համալսարանի, ՀՀ ԳԱԱ Մաթեմատիկայի ինստիտուտի, ՀՀ ԳԱԱ Բյուրականի աստղադիտարանի, Երեւանի պետական համալսարանի, Ռուս-Հայկական համալսարանի, Հայաստանի ազգային ագրարային համալսարանի 50 գիտնականներ հանդես եկան գիտական զեկուցումներով:
«Journal of Mathematical Sciences (Springer Nature)» գիտական ամսագրի գլխավոր խմբագիր, պրոֆեսոր Ա. Կարապետյանցը ներկայացրեց ամսագրի գործունեությունը:
Այսպիսի միջազգային գիտաժողովներն անշուշտ մեծ նշանակություն ունեն մեր երկրում այդ բնագավառի հետագա զարգացման համար:
Ստեփան ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
