ԱՄՆ նախագահ Դոնալդ Թրամփը Պեկինին սպառնացել է նրանով, որ ամերիկյան ընկերությունները ստիպված կլինեն ՉԺՀ-ից տեղափոխվել ուրիշ երկրներ, եթե վերջինս պատասխան միջոցներ ձեռնարկի ԱՄՆ-ի նոր մաքսատուրքերի դիմաց: Այդ մասին նա գրել է մայիսի 13-ին իր թվիթերյան էջում:
«Չինաստանում չի մնա որեւէ մեկը, ում հետ հնրավոր լինի գործարարությամբ զբաղվել: Շատ վատ է Չինաստանի համար, շատ լավ է ԱՄՆ-ի համար: Բայց Չինաստանն այնքան երկար ժամանակ է օգտվել ԱՄՆ-ից, որ հիմա ինքը առջեւում է: Այնպես որ, Չինաստանը չպետք է պատասխան միջոցներ ձեռնարկի. դրանից իրավիճակը միայն կվատթարանա: Ես բացեիբաց հայտարարում եմ նախագահ Սի Ցզինպինին եւ մեր բոլոր չին բարեկամներին, որ Չինաստանի համար շատ ցավոտ կլինի, եթե դուք գործարք չկնքեք, քանի որ ընկերությունները ստիպված կլինեն լքել Չինաստանը հօգուտ ուրիշ երկրների: Չինաստանում ապրանք գնելը չափից ավելի թանկ է նստում: Դուք ունեիք գրեթե կնքված գործարք, բայց նահանջեցիք», հայտարարել է Թրամփը:
Ավելի վաղ հաղորդվել էր, որ ԱՄՆ-ի եւ ՉԺՀ-ի առեւտրական բանակցությունները ավարտվել են մայիսի 10-ին առանց գործարքի կնքման: Կնքմանը չսպասելովՙ Թրամփը բարձրացրել էր ներմուծվող չինական ապրանքների մաքսատուրքերը:
Թրամփի ցուցումով, ԱՄՆ-ը ներմուծվող չինական ապրանքների մաքսատուրքերը 10-ից բարձրացրել են 25 տոկոսիՙ ընդհանուր առմամբ մոտ 200 մլրդ դոլար գումարով: Ավելի ուշ, Թրամփը հանձնարարեց մաքսատուրքերը բարձրացնել եւս 300 մլրդ դոլարով, հաղորդում է korrespondent.net կայքը:
Ի պատասխանՙ Չինաստանը հայտարարել է, որ բարձրացնում է ներմուծվող ամերիկյան ապրանքների վրա սահմանված մաքսատուրքերը ընհանուր առմամբ 60 մլրդ դոլարի չափով: ԱՄՆ-ից ներմուծվող զանազան ապրանքատեսակների խմբերի վրա մաքսատուրքերը կավելացվեն ընթացիկ տարվա հունիսի 1-ից:
