Ապրիլի 7- ի մեր հրապարակման մեջ տեղեկացրել էինք, թե ԵՄ ֆինանսների նախարարները տեսախորհրդակցություն են գումարելՙ նոր կորոնավիրուսի հետեւանքով ստեղծված ճգնաժամը մեղմելու նպատակով։
Երկարատեւ, սուր բանավեճերից հետո երեկՙ ապրիլի 9- ի ուշ երեկոյան մասնակիցները թվիթերյան գրառմամբ ծանուցեցին, թե իրենց հաջողվել է արդյունք գրանցել։ Երկար վիճաբանություններից հետո փոխհամաձայնության են եկել համաեվրոպականՙ շուրջ 500 միլիարդ եվրո սատարման փաթեթի վերաբերյալ. գումարը տրամադրվելու է կորոնավիրուսի հետեւանքով տուժած պետություններին, ֆիրմաներին, աշխատողներին։
ԳԴՀ ֆինանսների նախարար Օլաֆ Շոլցը գնահատել է երեկվա օրըՙ որպես եվրոպական համերաշխության մեծ վկայություն։ «Միասնականությունը ցույց է տալիս, որ ԵՄ պետությունները բանակցում են, եւ Եվրոպական Միությունը գործում է»։
Նոր կորոնավիրուսի հետեւանքով ստեղծված ճգնաժամի պատճառով Եվրոպայում տնտեսական անկումն անխուսափելի է։ Միլիարդավոր գումարներ կազմող սատարող միջոցառումները կբարձրացնեն պետությունների ազգային պարտքը։ Դա հատկապես ծանր կլինի Իտալիայի համար։ Ի թիվս այլ երկրների, Իտալիան, Իսպանիան, Ֆրանսիան պահանջում են այսպես կոչված Կորոնա պարտատոմսերի միջոցով փրկել իրադրությունը։ Եվրոպական երկրները կարող են համատեղ գործարկել հաստատագրված տոկոսադրույքով արժեթղթեր։ Այս եղանակով կառավարությունները ֆինանսական շուկաներից կոլեկտիվ վարկ ( այսինքնՙ պարտք) կվերցնեն, այնուհետ համատեղ պատասխանատվություն կստանձնենՙ տոկոսների եւ պարտքի մարման համար։
Գերմանիան, Ավստրիան, Նիդեռլանդները դիմակայում են, տեսախորհրդակցության ժամանակ էլ դեմ են արտահայտվել, մերժել են Իտալիայի, Իսպանիայի, Ֆրանսիայիՙ պարտատոմսերի պահանջը։
