Գազի գնի հնարավոր բարձրացումը լուրջ անհանգստություն է առաջացրել բնակչության շրջանում եւ դա հասկանալի է, քանի որ դա առաջին հերթին հարվածում է սոցիալապես անապահով խավերին։ Ինչպես գիտեք, Գազպրոմ-Արմենիան դիմել է գների կարգավորման հանձնաժողովինՙ գազի գինը որոշ սպառողների համար մինչեւ 36 տոկոս բարձրացնելու համար։
Նման իրավիճակի պատճառը 2019թ․ գազի գնի բարձրացումն էր սահմանին 150-ից մինչեւ 165 դոլարի, այս բարձրացումից հետո գազի գինը ՀՀ ներքին սպառողի համար չփոխվեց։ Սա տեղի ունեցավ հիմնականում Գազպրոմ-Արմենիայի ներքին ռեսուրսի հաշվին, որը, ինչպես հայտնի է, հավերժ չէ։
Գազպրոմ-Արմենիան այսօր արդեն հայտարարում է, որ այս գներով այլեւս չի կարող շարունակել աշխատել եւ հարկադրված է հայտ ներկայացնել գազի գնի բարձրացման համար։ Նկատենք, որ սա պատահական չէր, եւ որ այդ մասին Գազպրոմ-Արմենիայի եւ կառավարության միջեւ դեռ այս տարվա հունվարին կար պայմանավորվածություն։
Կառավարությունը գնի բարձրացման հայտը կարող է քննարկել եւ պատասխանել 90 օրվա ընթացքում։ Կբավարարվի թե ոչ այդ պահանջը, կախված է այն բանից, թե որքանով է հիմնավոր այն։
Փորձը ցույց է տալիս, որ որպես կանոնՙ գինը բարձրացնում են, բայց ոչ այն քանակով, ինչքան որ հայտում էր նշված։ Սրան զուգահեռ կառավարությունը փորձում է, փոխվարչապետի մակարդակով, բանակցություններ սկսել Գազպրոմի հետ։
Նկատենք, որ ներհայաստանյան գինը որոշում է ոչ թե Մոսկվան, այլ ՀՀ կառավարությունը Գազպրոմ-Արմենիայի հետ միասին, իսկ ՌԴ-ի հետ պետք է բանակցել, եւ միայն վարչապետի մակարդակովՙ Վրաստան-Հայաստան սահմանին գազի գինը իջեցնելու համար։ Եթե այդ բանակցությունները հաջող ընթանան, ապա միայն այդ դեպքում հնարավոր կլինի պահպանել նախկին գինը։
Ինչ վերաբերում է այն հարցին, թե ինչու է գազի գինը բարձրանում սոցիալապես անապահով խավերի համար, նկատենք, որ Գազպրոմ-Արմենիան վերջիններիս գազը վաճառում է անհամեմատ ավելի էժան գնով, քան մյուսներին, ու դա եւս ընկերությունն անում էր իր ներքին ռեսուրսների հաշվին, հիմա փաստացի հայտարարում է, որ այլեւս չի ցանկանում այդ «բեռը» իր վրա կրել։
Հետեւաբար այստեղ այդ խավերին իր օգնության ձեռքը պետք է մեկնի կառավարությունը, որը պարտավոր է սուբսիդավորել այդ մարդկանց համար գազի թանկացումը։ Նկատենք նաեւ, որ ըստ այդ նոր հայտի, գազի գինը խոշոր սպառողների համար մոտ 2 տոկոսի չափով նվազում է։
