Արդյո՞ք միայն Հատիսն է վաճառված, միգուցե էլի սարեր կան վաճառված, ինչու՞ եք միայն այդ սարի վրա ֆիքսվել. ԿԳՄՍ նախարար
Հատիս սարի վրա Հիսուս Քրիստոսի արձանի տեղադրման՝ Գագիկ Ծառուկյանի նախաձեռնությունը նախորդ շաբաթ վարչապետ Փաշինյանը դրական գնահատեց: Հիմնարկեքի արարողությունից հետո էլ, պարզվեց, շինաշխատանքները պետք է կասեցվեն: ԿԳՄՍ-ն էր հայտարարություն տարածել, որ Հատիսը նորահայտ հուշարձանի կարգավիճակ ունի եւ այստեղ տարբեր դարաշրջաններին թվագրվող քսանից ավելի հուշարձան կա: Ինչու՞ հենց այդ նիստին, երբ Փաշինյանը գոհունակությամբ էր խոսում նախագծի մասին, ԿԳՄՍ նախարար Վահրամ Դումանյանը չհայտնեց իր մտահոգությույնը եւ միայն օրեր անց, օրենք ու իրավունք մեջբերելով, ասաց, որ շինարարությունը պետք է կասեցվի, քանի դեռ հաստատված նախագիծ չկա:
«Դուք ի՞նչ հակասություն եք տեսնում վարչապետի և իմ ասածի մեջ, վարչապետն ի՞նչ է ասել, ասել է, որ գաղափարին նորմալ ենք վերաբերվում»,- կառավարության նիստից հետո լրագրողներին ասաց Վահրամ Դումանյանը:
Նա նշեց, որ գաղափարի շուրջ ինքն էլ մտահոգություն չունի, մտահոգությունը միայն այն է, որ առանց նախագծի, շինարարություն չիրականացվի: Իսկ հարցին, թե բացառու՞մ է հենց Հատիսի վրա արձանի տեղադրումը, Դումանյանը պատասխանեց ՝ այս պահին այդ հարցը բաց է:
Լրագրողները նաեւ հետաքրքվեցին, թե որպես բարձրաստիճան պաշտոնյա` ինչպե՞ս է վերաբերվում այն հանգամանքին, որ հսկայական սարը վաճառվեց Ծառուկյանին մի քանի միլիոն դրամով: Դումանյանն ասաց՝ վաճառքից տեղեկություն չունի:
«Ես չգիտեմ՝ ինչպես է վաճառվել, որ թվականին: Ասում եք՝ մի քանի միլիոն դրամ, բայց դա դուք գիտեք, իսկ եթե գիտեք, ինձ էլ ասեք, ես չեմ տիրապետում մանրամասներին: Եվ արդյո՞ք միայն այդ սարն է վաճառված, ինչու՞ եք այդ սարի վրա ֆիքսվել, միգուցե էլի սարեր կան վաճառված, ես չգիտեմ»:
