Ադրբեջանի ղեկակավարության համար ծանր է ընդունել, որ Արցախի տարածքում գտնվող բազմաթիվ հայկական սրբավայրեր շատ ավելի հին են, քան արհեստածին Ադրբեջան պետությունը, այդ իսկ պատճառով ժամանակ առ ժամանակ հայկական հուշարջանների օտարներին վերագրելու անլուրջ փորձեր են ձեռնարկում: «Ազգ»ի հետ զրույցում նման տեսակետ է հայտնում Բյուրականի Սուրբ Հովհաննես Մկրտիչ եկեղեցու հոգեւոր հովիվ տեր Վրթանես քահանա Բաղալյանն՝ անդրադառնալով այն տեղեկությանը, թե Ադրբեջանը հերթական անգամ թիրախավորել է Դադիվանքը:
Ըստ նրա՝ ադրբեջանցիները Դադիվանքը նախ փորձեցին որպես ուդիակական մշակույթի մաս ներկայացնել՝ չընկալելով սակայն, որ ուդիները պատմական Ուտիքի նահանգի բնակիչներն են, որոնք ազգությամբ հայ են, ինչպես լոռեցիները, սյունեցիները կամ արցախցիները, այժմ էլ Բաքուն հարցը փորձում է Ռուս ուղղափառ եկեղեցու դաշտ նետել:
«Ադրբեջանի ռազմաքաղաքական էլիտան չի հաշտվում այն իրողության հետ, որ նոյեմբերի 9-ի հայտարարությունից հետո, երբ Ամենայն հայոց կաթողիկոս Գարեգին Բ-ի անմիջական ջանքերով ու Համայն Ռուսիո պատրիրաք Կիրիլի միջնորդությամբ պայմանավորվածություն էր ձեռք բերվել թույլատրել Դադիվանքի վանական համալիրում Հայ առաքելական եկեղեցու սպասավորների հոգեւոր ծառայությունն ու քրիստոնյա հայ ժողովրդի ուխտագնացությունը, պաշտոնական Բաքուն, չհաշտվելով հայ հոգեւորականների ներկայության հետ՝ այժմ ցանկանում է մեզ համար անհասանելի դարձնել նաեւ Դադիվանքը»,- նշում է հոգեւորականը:
Եթե ադրբեջանցիներին հաջողվի ոչ հայանպաստ այս ծրագիրը կյանքի կոչել, ապա Դադիվանքում, մեր տեղեկություններով, ծառայության կնշանակվի Ռուս ուղղափառ եկեղեցու Բաքվի թեմակալ առաջնորդ Արխիմանդրիդ Ալեքսեյ Նիկոնորովը, որ սերտ կապերի մեջ է Բաքվի քաղաքական էլիտայի ներկայացուցիչների հետ, օգտվում է Մեհրիբան Ալիեւայի կողմից ղեկավարվող «Հեյդար Ալիեւ» անվան ֆոնդի «բարիքներից»:
ՍԵՎԱԿ ՎԱՐԴՈՒՄՅԱՆ
