Հայաստանը դեռ չունի վերգետնյա կառավարման կենտրոն, չունի համապատասխան մասնագետներ, ուստի արբանյակը չի կարող կիրառվել, արբանյակը տիեզերք բաց թողնելը մի բան է, այն օգտագործելը լրիվ այլ բան: Այդ արբանյակն օգտագործելու համար պետք է լինի վերգետնյա կառավարման կենտրոն: «Փաստինֆո»-ի հետ զրույցում հայտարարել է ռազմական փորձագետ Վան Համբարձումյանը:
Հիշեցնենք, որ մայիսի 26-ին Նիկոլ Փաշինյանը հայտարարեց, որ Հայաստանը տիեզերք է արձակել իր առաջին արհեստական արբանյակը: Այն արձակվել է ԱՄՆ Կանավերալի հրվանդանում գտնվող տիեզերակայանից՝ SpaceX ընկերության տիեզերանավով՝ հայկական պետական «Գեո կոսմոս» փակ բաժնետիրական ընկերության և իսպանական «Սատլանտիս» ընկերության համագործակցության արդյունքում։
Ռազմական փորձագետ Վան Համբարձումյանը մեզ հետ զրույցում նշեց, որ արբանյակն իսպանական արտադրության է,Հայաստանի կառավարությունն այն գնել է իսպանական կազմակերպությունից:
Նրա փոխանցմամբ՝ արբանյակը կարելի է հետախուզական նպատակներով օգտագործել, եթե վերգետնյա կառավարման կենտրոն և համապատասխան մասնագետներ լինեն.
«Հայաստանը չունի վերգետնյա կառավարման կենտրոն: Այդ արբանյակը պետք է օգտագործել, որպեսզի շարքից դուրս չգա, բայց այս պահի դրությամբ՝ այն չի կարող կիրառվել, օրինակ` Ադրբեջանում սովորական կապի արբանյակ բաց թողելուց առաջ ստեղծվում է վերգետնյա կառավարման կենտրոն, մասնագետներ են պատրաստվում, հետո նոր արբանյակը տիեզերք են բաց թողում, իսկ Հայաստանը հիմա արբանյակն ունի, բայց հատկացված տարածք կամ մասնագետներ չունի»,-ասաց Համբարձումյանը:
Ըստ նրա՝ վերգետնյա կառավարման կենտրոնը հսկա տարածք է, որտեղ կան համապատասխան անտենաներ, ադմինիստրատիվ շենքեր, անտենաներն ընդունող մասնագետներ, որոնք պետք է օրը 24 ժամ աշխատեն, որպեսզի այդ ամենը սպասարկեն, իսպանացիների հետ պետք է կապի մեջ լինեն.
«Այս ամենը շատ երկար գործընթաց է, միակ մտավախությունս, որ ՍՈՒ-երի նման չլինի, երբ կործանիչը բերեցին, բայց հրթիռներ չունեին»,-ասաց ռազմական փորձագետը:
Աղբյուր` Փաստինֆո
