«Փաստինֆո» լրատվականը զրուցել է Ազատության հրապարակում ավելի քան 20 օր նստացույց հայտարարած «Սև հովազ» ռազմահայրենասիրական ՀԿ-ի ղեկավար Սերոբ Գասպարյանի հետ։
– Պարոն Գասպարյան, ուզում եմ շնորհավորել ձեզ օրվա խորհրդի՝ Հաղթանակի տոնի առիթով, որովհետև այն հաղթանակները, որոնք մենք ունեցել ենք՝ նաև ձեր և ձեր լուսահոգի եղբոր շնորհիվ է եղել…
-Կարծում եմ, այսօր ավելի տեղին կլիներ ցավակցել մեզ…
-Հասկանում եմ՝ ինչ նկատի ունեք, պարոն Գասպարյան, այնուամենայնիվ, չեմ ցավակցում, որովհետև խոսում եմ մեկի հետ, ով չի դադարում պայքարը՝ հետ բերելու կորցրածը։ Եթե այլ մեկի հետ զրուցեի, գուցե և ցավակցեի…
-Գիտե՞ք, եռատոնը մեզ համար ամենաուրախ տոներից մեկն է եղել միշտ՝ Շուշիի ազատագրումից ի վեր, բայց սպանեցին մեր մեջ եռատոնը, սպանեցին մեր լավագույն տղերքին, նրանց հետ էլ՝ մատաղ սերնդին, հազարներով սպանեցին…Իրականում, սա չի արվել մի ժամում, մի օրում կամ մի տարում։ Սա արվել է երկար ու ձիգ 30 տարիների ընթացքում։ Մարդկանց միջից հանեցին Քրիստոնեությունն ու հայրենասիրությունը, փոխարենը՝ ներարկեցին նյութապաշտություն։ Ես միշտ ասել եմ՝ մենք զրկված ենք եղել պետությունից, բայց եկեղեցին հարյուրամյակներով պահել է մեր ինքնությունը։ 30 տարիների ընթացքում մարդկանց մեջ սպանեցին, անգամ, հավատն առ Աստված և նոր կուռքեր շինելով, այսօր, հենց հիմա հրապարակներում կուռքեր են պաշտում նորից։ Ինչ – որ փրկիչներ են փնտրում, չես հասկանում՝ ինչո՞վ են զբաղված, այն պարագայում, երբ մեր երկիրն ու, առհասարակ, հայի գոյությունն է վտանգված։ Հայ ազգի և քրիստոնյաների համար մեկ փրկիչ կա՝ Հիսուս Քրիստոսը, մնացածը գործիքներ են։
-Չե՞ք կարծում, որ, այնուամենայնիվ, գործիքներ մեզ, նույնպես, պետք են՝ ստեղծված իրավիճակից ինչ – որ կերպ դուրս գալու համար։ Չեմ վիճարկում, սակայն, որ դրանք անպայման պետք է լինեն հենց հրապարակներից։
– Գործիքներ, մեզ, իհարկե, պետք են, բայց ոչ նրանք, ովքեր եղել են այս արհավիրքի անմիջական մեղավորները, ինչպես նաև՝ այս դիվական ուժերի ներմուծման համար, ովքեր այսօր իրենք իրենց ղեկավար են կարգել մեր գլխին ու կործանման են տանում մեր երկիրը։
– Լավատեսության ոչ մի նշույլ չե՞ք տեսնում, պարոն Գասպարյան, որ կարող է նաև փրկություն լինել մեզ համար։
– Ես առաջինը եկա Ազատության հրապարակ և հիմա սպասում եմ, թե երբ բեմից կիջնեն Թատերական ինստիտուտ ավարտած, այսպես կոչված, քաղաքական գործիչները, որից հետո, մենք կսկսենք մեր քայլը և կավարտենք այն հաջողությամբ։
– Ո՞ւնեք հատուկ կոչ կամ ասելիք այսօրվա համար, պարոն Գասպարյան։
-Այո, ունեմ ասելիք՝ բոլոր գիտակից մարդիկ, ովքեր ատում են նախկիններին և ներկաներին, թող պատրաստ լինեն ազգի իրական հավաքին, իրական պայքարին ու հաղթանակին։ Շուտով այս թատերաբեմը կավարտվի։
Աղբյուր` Փաստինֆո
