Վստահ եմ՝ մեկ օր հասնելու ենք եռատոնի լրիվ նշանակության վերականգնմանը,Շուշիի լեռներում կրկին հայկական հարսանիքներ են կազմակերպվելու. Արտակ Բեգլարյան

Արցախի Հանրապետության պետնախարար Արտակ Բեգլարյանը գրել է.
Մայիսի 9-ը մեզ համար միշտ մնալու է եռատոն՝ հաղթանակի, վերածննդի, ազգային արժանապատվության ու պատմական արդարության խորհուրդներով: Ուստի, որքան էլ ծանր մարտահրավերների ենք բախվել վերջին երկու տարում, միևնույն է՝ ոչ ոք չի կարող այս եռատոնը մեկնաբանել որպես սգո օր՝ միաժամանակ չմոռանալով այս տոների համար ամենաթանկ գինը վճարած անձանց հիշատակի առջև հարգանքի տուրք մատուցել:
Շուշին եղել է ու կլինի հայկական, և մեր միասնական, հետևողական ու ռազմավարական ջանքերի արդյունքում, վստահ եմ, մեկ օր հասնելու ենք եռատոնի լրիվ նշանակության վերականգնմանը: Շուշիի լեռներում կրկին հայկական հարսանիքներ են կազմակերպվելու, ինչպես մեր ու հազարավոր այլ ընտանիքներ են ձևավորվել պատմության ընթացքում՝ հանուն հայոց բնիկ ժողովրդի ու հայրենիքի հարատևման:
Շնորհավո՛ր Մայիսյան եռատոնը. ես հպարտ եմ Շուշիի ազատագրմամբ, Պաշտպանության բանակի կազմավորմամբ և Մեծ հայրենական պատերազմի հաղթանակով: Հավերժ շնորհակալություն Մայիսյան եռատոնի բոլոր կերտողներին:
ՉԿԱ ԱՐՑԱԽ ԱՌԱՆՑ ՇՈՒՇԻԻ… ՉԿԱ ՀԱՅԱՍՏԱՆ ԱՌԱՆՑ ԱՐՑԱԽԻ…