Մինչ օրս ոչ մի մեղավոր չի պատժվել։ Ուզում ենք վարչապետի հետ հանդիպենք։ «Փաստինֆո»-ի հետ զրույցի ժամանակ այս մասին ասաց կառավարության դիմաց ակցիա իրականացնող զոհված զինծառայողի հայր Գարիկ Մխիթարյանը։
«Վարչապետի օգնականը դուրս եկավ ու ասաց, որ հանդիպում հնարավոր չէ, քանի որ մինչև ժամը 9-ը վարչապետը հանդիպումներ ունի։ Ասացինք, որ պատրաստ ենք սպասել ու 9։30 հանդիպել, բայց պատասխանից այն հասկացանք, որ վարչապետը նոր ասելու բան չունի, որովհետև ամեն ինչ նույնն է։
Ամբողջ խնդիրն էլ հենց դա է, որ ոչ մի բան չի փոխվել, ոչ մեկին ոչ պատժում են, ոչ էլ ինչ-որ մեկի հարցով զբաղվող»,-նշեց Գարիկ Մխիթարյանը։
Հարազատաները նշում են, որ կան ծնողներ, որոնց ասում են՝ ԴՆԹ-ն հաստատվել է, բայց ծնողներն այդ ամեն ինչի հետ չեն համակերպվում։
«Դա այն է, որ խաբեն ծնողին, որ քո երեխան է, վերցրու գնա, որ չգաս կառավարություն, չբողոքես, չասես՝ տուր իմ երեխուն։ Դա ԴՆԹ-ի սուտ պատմությունն է»,-ասաց ծնողներից մեկը։
Հարցին՝ արդյոք կայացա՞վ ծնողների հանդիպումը Քննչական կոմիտեի նախագահ Արգիշտի Քյարամյանի հետ, Գարիկ Մխիթարյանն ասաց, որ հանդիպել են, որի ժամանակ իրենց ներկայացրել են, թե ինչ ուղղություններով են աշխատելու։
«Ձևավորվելու է 10 հոգուց բաղկացած խումբ։ Խմբեր կային, ցրեցին այդ խմբերին, և Արգիշտի Քյարամյանը եկել, ուզում է նոր խումբ ձևավորի։ Հնարավոր է՝ այդ կառույցն աշխատել է, բայց ոչ բավարար, որովհետև եթե բավարար լիներ, մինչ օրս չեն կարողացե՞լ պարզել՝ մեղավորներն ովքեր էին։ Այսօր զինվորին պարտադրում են, որ գնա բուշլաթ առնի։ Անգամ խանութի տեղն են ցույց տալիս»,-նշեց Գարիկ Մխիթարյանը։
Աղբյուր` Փաստինֆո
