Քանի մը օր առաջ, ընկերներէս մէկուն ֆէյսպուքի էջին վրայ նկարի մը հանդիպեցայ, որուն մասին ան արդարացի ցասումով կ՛արտայայտուէր: Նկարը՝ ըստ նշուածին Տիանա Ղզրոյեան կոչեցեալ սեռափոխուած (transgender) մարդու մը կը վերաբերէր, որ կը նախապատրաստուի Հայաստանի անունով մասնակցելու սեռափոխուածներու այսպէս կոչուած գեղեցկութեան մրցոյթի:
Ինչ մեղքս պահեմ, նախ կասկածեցայ լուրին ճշմարտացիութեանը վրայ, սակայն ուզեցի ստուգել զայն: Ֆէյսպուքի վրայ փնտռեցի նշեալ անձը ու գտայ: Նախ պարզ է, որ նման անձ գոյութիւն ունէր, մինչ լուրը՝ իրաւ էր: Ի դէպ բնաւ չզարմացայ տեսնելով Տիանա կոչուածին ֆէյսպուքի անձնական էջին պատին նկարը (տես վերեւը), որ կը հաստատէր իր «քաղաքական» պատկանելիութիւնը: Նոյնպէս զարմանալի չէր ինծի համար յայտնաբերել նշեալ անձին մէկ այլ նկարը, որ կը ծանուցէ, թէ ինք Թուրքիա այցելած է (դարձեալ տես նկարը)…:
Տիանա կոչեցեալը հետեւեալ գրառումը կատարած էր ֆէյսպուքի վրայ (արեւելահայ ուղղագրութիւնը կը պահեմ նոյնութեամբ». «Ողջույն իմ սիրելի հետևորդներ, ընկերներ և հարազատներ, ցանկանում եմ ձեզ հետ կիսվել շատ ուրախ նորությամբ, որը անակնկալ կլինի բոլորիդ համար։
Իմ կյանքում տեղի է ունեցել մի շատ մեծ իրադարձություն, որը կարելի է ասել եղել է իմ կյանքի մեծ երազանքներից մեկը։ Առաջին անգամ Հայաստանը մասնակցելու է Miss Star International գեղեցկության մրցույթին, որը տեղի է ունենալու 2024 թվականի դեկտեմբերին, Բրազիլիայի Սան Պաուլո քաղաքում, և մեր երկիրը մեծ պատվով ներկայացնելու եմ ես: Անչափ ուրախ եմ և հպարտ որ ստանձնել եմ այս պարտականությունը: Քանի որ սա ոչ միայն մրցույթ է` այլ նաև հնարավորություն այդպիսի լայն հարթակից բարձրացնելու իմ ձայնը ընդդեմ խտրականության և անհավասարության։
Ինձ անհրաժեշտ է ձեր աջակցությունը որպեսզի վստահ ներկայանամ մրցույթում։ Շարունակեք հետևել իմ էջին որպեսզի բաց չթողնեք կարևոր նորությունները»։
Իմ անձնական, մասնագիտական, թէ հանրային կեանքիս ընթացքին փորձած եմ միշտ հանդուրժողական կեցուածք մը ունենալ նման պարագաներու հանդէպ, միասեռականութիւնը, թէ սեռափոխութիւնը համարելով անձնական ընտրութիւն եւ համարած եմ, որ մենք ո՛չ ոք ենք դատելու զիրենք: Սակայն հանդուրժողականութիւնս ունի իր սահմանափակումը: Ըստ իս, նմանօրինակ պարագաներուն մարդկային ազատութիւնը կ՛աւարտի հոն, ուր կը վերածուի փրոփականտի, հրապարակային «շքերթներու», մարտահրաւէրի եւ նմանօրինակ այլանդակութիւններու: Հանրային բարոյականութիւնը պահպանելը օրինական պարտաւորութիւն է, որ կարելի չէ շրջանցել պահուըտելով այսպէս կոչուած մարդկային ազատութիւններու ետին, կամ շահագործելով զայն:
Հարցը աւելի եւս անհանդուրժելի կը դառնայ երբ իրավիճակը կ՛ունենայ պետական «հովանաւորութիւն», որ այլ բան չէ, քան քաջալերանք նման երեւոյթներու, որ կը սպառնայ տուեալ հաւաքականութեան դարաւոր արժեհամակարգին:
Այս պարագային, խնդիրը՝ Տիանա կոչուած մարդուն «Հայաստանը ներկայացնելուն» մէջ կը կայանայ, որ ի դէպ աննախընթաց է մեր Հայրենիքի պատմութեան մէջ:
Արժէքներու անկում է, որ մեր երկրին մէջ զարմանալի արագութեամբ կը գլորուի դէպի անյատակ անդունդ, որուն համար պատասխանատու են ներկայ անհասկնալի իշխանութիւնները, որոնք իրենց դիրքերը պահելու համար, ըստ երեւոյթին պատրաստ են ամէն տեսակի այլանդակութեան:
Ծագումով Ատանացի մեծ մայրս, ի տես իր կրօնական հաւատալիքները, թէ բարոյական սկզբունքները հակասող երեւոյթներուն, կ՛ըսէր. «տիւնեանըն սոնու կելմիշ» (աշխարհի վերջն է): Մեր ազգային դաստիարակութենէն ելլելով, իմ կարգին ես պիտի ըսեմ, որ սա մեր ազգին եւ «Հայրենիք» հասկացողութեան ու անոնց հանդէպ ունեցած մեր ընկալումներուն վերջն է: Կը համարձակիմ ըսելու, որ գալիքը աւելի եւս ահաւոր է մանաւանդ երբ իր նմաններուն պէս, իր ձեւին ու բովանդակութեան մէջ քաղաքականացած վերոյիշեալ մրցանքին, յանկարծ «յաղթանակէ» այսպէս կոչուած «Հայաստանի ներկայացուցիչ»-ը, հեռակայ հազարաւոր քուէներ ստանալով նաեւ Հայաստանի Հանրապետութեան բնակիչ մեր հայրենակիցներէն…:
ՍԵՒԱԿ ՅԱԿՈԲԵԱՆ
«Զարթոնք», Լիբանան
