Իջևան խոշորացված համայնքում աննախադեպ կարկուտի հետևանքով ավերվել են ցանքատարածությունները, վնասվել է ողջ բերքը, նաև մարդկանց գույքը։
Սահմանապահ Տավուշն ու տավուշեցին առանց այդ էլ բազմաթիվ խնդիրներ ունեն։ Եվ հիմա, բերքահավաքին սպասող գյուղացին հայտնվել է անելանելի դրության մեջ։ Ժողովրդական խոսքն ասում է . «կարկուտը ծեծած տեղն է ծեծում»։
Մարդիկ ամբողջ տարին աշխատելով էլ չեն կարող մեղմել այն վնասը, որ կրեցին կարկուտի հետևանքով։
«Հայաստան» խմբակցության տավուշցի պատգամավոր Գառնիկ Դանիելյանն է մտահագություն հայտնել՝ Կառավարությունն ասում է, թե 35 միլիարդ դրամի ներդրում է արել գյուղատնտեսության մեջ։
«Որտե՞ղ է մսխվում այդ գումարը։ Ինչու՞ չի հատկացվում գյուղացուն՝ որպես վնասի փոխհատուցում։
Բացի այդ, չեն ձեռնարկվում կանխարգելիչ միջոցառումներ։
Ըստ անհրաժեշտության՝ արդյունավետ կերպով չեն կիրառվում հակակարկտային կայանները, չի ավելացվում դրանց քանակը ՀՀ տարածքում։
Իրավիճակի ողջ պատասխանատուն այս իշխանություններն են։ Բազմիցս բարձրաձայնել եմ այս մասին, մինչդեռ, Էկոնոմիկայի նախարարը անհոգ դեմքով պատասխանում է, որ իրենք ավելին չեն կարող անել։ Իրականում, ոչ թե չեն կարող, այլ չեն ուզում։
Անպատասխանատվության և անլրջության հետևանքով այսօր տուժում է գյուղացին և գյուղատնտեսությունը»,-նկատել է պատգամավորը։
