Էկոնոմիկայի վերջին 3 նախարարներն այս հարկումները դիտարկում են որպես խոշոր տնտեսվարողների թաքնվելու տեղ. ասաց ՓՄՁ շահերի պաշտպաններից մեկը։
Կառավարության շենքի դիմաց տնտեսվարողները շարունակում են բողոքի ակցիան՝ իշխանություններից պահանջելով հետ կանչել 5 տոկոս շրջհարկը 10 տոկոս դարձնող օրենքը։
Ամբողջ աշխարհը գնում է հարկերի պարզեցմանն ու կանխատեսելիությանը, մենք գնումենք հակառակ ուղղությամբ. դժգոհում են նրանք։
«Մեր պահանջները փաստաթղթավորել ենք, պաշտոնապես գրել ենք Կառավարության ղեկավարին, Ֆինանսների նախարարին, ԱԺ տնտեսական հանձնաժողովին։ Կասեցրե՛ք օրենքը, նստենք, հանգիստ խոսենք, հասկանանք։ Մեր պահանջն է, որ կառավարության հաջորդ նիստին պատասխան լսենք»,- ասաց ՓՄՁ շահերի պաշտպանող ասոցիացիայի ներկայացուցիչը։
Այն օրենքները, որոնք ունեն մեծ շահառու խմբեր՝ հայտարարագրումը՝ 700 հազար մարդ, ՓՄՁ-ները՝ 60 հազար տնտեսվարող, մեծ ակնկալիք չունենք, որ իշխանությունները խելամիտ կգտնվեն ու ավելի խորքային ուսումնասիրություն կկատարեն, ավելի լավ լուծումներ կգտնեն. ասում են ակցիայի մասնակիցները։
Կառավարության որոշում կա, ըստ որի՝ եթե շահառուների մեծ խմբի նկատմամբ օրենսդրական փոփոխություն է արվում, պետք է նաև ազդեցության գնահատում արվի։
«Մենք ասում ենք՝ եկեք հետաձգեք այս օրենքը, որովհետև ՓՄՁ ոլորտում տարբեր շերտեր կան, նույն օրենքը յուրաքանչյուրի վրա տարբեր կերպ է ազդում։ Ոսկու շուկան մի բան է առաջարկում, հագուստի տոնավաճառը՝ այլ բան, մարզային խանութը՝ բոլորովին այլ։ Բոլորի խնդիրները տարբեր են ու առանձնահատուկ, որպեսզի խորքային վերլուծություն արվի, ժամանակ է պետք, հակառակ դեպքում՝ հիմա հավասար պայմաններում չենք։ Օրենքն ընդունել են, հիմա այս մարդիկ տուգանքներ են «վաստակում»,- իրավիճակը ներկայացնում է իրավապաշտպանը։
