Արցախցից բռնի տեղահանված ևս 50 կին առաջիկայում կստանա մասնագիտական նոր ու կիրառելի հմտություններ՝ ավելի մրցունակ մասնագետ դառնալու և աշխատանք գտնելու համար։ Մասնագիտական կողմնորոշման հարցում օգնում է «Հաբ Արցախը»՝ «Սլացքը» դինամիկ նախաձեռնությամբ։
«Նման ծրագրերը մեծ կարևորություն ունեն արցախահայերի համար, որոնք որևէ փորձ չունեն բիզնես ոլորտում, սա մեծ հնարավորություն է և՛ մտահորիզոնը փոխելու, և՛ նոր գիտելիք ու հմտություններ ձեռք բերելու համար նոր գործը սկսելու կամ նոր աշխատանք գտնելու համար»,- ասում է ծրագրի մասնակիցներից Մելանյա Ավետիսյանը։
«Սլաքն» արդեն հաղթահարել է առաջին «ռաունդը»։ Երկրորդ փուլի մասնակիցները կարող են ընտրել վերապատրաստման երկու հիմնական ուղղություններից մեկը՝ հաշվապահություն կամ ադմինիստրատիվ աշխատանք։ Երեք ամիս տևողությամբ դասընթացները վարելու են նշված ոլորտների առաջատար մասնագետները։ «Հաբ Արցախը» ծրագրի երկրորդ փուլի համար ընտրել է այս մասնագիտությունները՝ աշխատաշուկայի բազմակողմանի ուսումնասիրության և կարիքների գնահատման արդյունքում՝ կարևորելով գիտելիքի կիրառելիությունն ու մասնակիցների զբաղվածության խնդիրն իրապես լուծելու հարցը։
««Սլացքը» կարիքահեն, օգտակար ու իրոք արդյունավետ ծրագիր է, որի արդյունքներն արդեն շոշափելի են։ Երկրորդ փուլում ևս ջանք չենք խնայելու, որ մասնակիցներին ներկայացնենք լավագույն ծրագիր, լավագույն մասնագետներից սովորելու հնարավորություն և իհարկե մեր ուշադրության կենտրոնում է լինելու նաև դասընթացից հետո նրանց զբաղվածության խնդիրը։ Լիահույս ենք, որ, որ «Սլացքը» շարունակական կլինի»,- նշում է «Հաբ Արցախի» գործադիր տնօրեն Շուշան Քէշիշեանը։
«Սլացքի» առաջին փուլի 50 մասնակիցները վերապատրաստվել են գեղեցկության և սննդի ոլորտների, կարուձևի ուղղությամբ․ նրանց զգալի մասն արդեն ունի աշխատանք։ Ծրագիրը ոչ միայն տրամադրում է տեխնիկական հմտություններ, այլև օգնում փափուկ և ձեռնարկատիրական հմտությունների ուսուցման, հոգեբանական աջակցության շնորհիվ վստահ քայլել դեպի աշխատաշուկա։
«Քանի որ «Հաբ Արցախը» շատ սերտ աշխատում է Արցախից տեղահանված անձանց հետ ու նրանց ուղղված մի շարք ծրագրերի իրականացման հաջող փորձառությունը հաշվի առնելով՝ որոշեցինք համագործակցել նոր երկրորդ փուլի շրջանակում։ «Սլացք» ծրագրի առաջին փուլի արդյունքներն իրոք տպավորիչ են ու շատ կարևոր են այն փոփոխությունները, որ կարողացել է այդ դժվար ժամանակահատվածում արցախցի կանանց համար ծրագիրը բերել։ Վստահ եմ, որ մի քանի ամիս անց, երբ ծրագրի մասնակիցները կավարտեն դասընթացը, կարձանագրենք աշխատաշուկայում գրանցած նոր հաջողությունները», – նշում է «Հաբ Արցախ»-ի հետ հգործակցող «ՕքսԵՋեն» հիմնադրամի ծրագրերի ղեկավար Քրիստինե Մխիթարյանը։
Ս․Վ․
