Կուզեի, որ արվեստի բոլոր գործիչները համախմբվեին համազգային այս շարժման շուրջ։ Իմ կողքին հիմա էլ բավական համախմբված մարդիկ կան՝ արվեստի տարբեր ներկայացուցիչներ, բայց հույս ունեմ, որ մնացածն էլ կհամախմբվեն, Azg.am-ի թղթկցի հետ զրույցում ասաց երգահան Դավիթ Ամալյանը։
«Օրինակ՝ 2018 թվականին չգիտեմ, թե ովքեր էին միացել։ Ոչ ոքի չեմ վիրավորի, բայց միացել էին, որովհետև ստրուկի հոգեբանություն ունեին. պայքարողները պայքարում էին նյութական արժեքի համար։ Իսկ հիմա մարդիկ պայքարում են ազգային և մարդկային արժեքների համար»,- ասաց երգահանը։
Անդրադառնալով Բագրատ սրբազանի՝ այսօր առավոտից քայլերթով Նկարիչների և Գրողների միություններ, ինչպես նաև ԳԱԱ շարժվելուն՝ Դավիթ Ամալյանը նկատեց, որ Գրողների միությունում, ինչպես նաև ԳԱԱ պատմության ինստիտուտում Սրբազանին և երթի մյուս մասնակիցներին շատ ջերմ ընդունեցին։
«Գրողների միությունում բոլորը մեր ընկերներն են, վերջին շրջանի բոլոր ընդվզումներին ներկա են եղել՝ երիտասարդ գրողներ, տարեց գրողներ։ Գրողների միությունն այսօր հրաշալի ընդունեց մեզ։
Ինչ վերաբերում է երաժիշտներին,ապա ես թեպետ Կոմպոզիտորների միության անդամ չեմ, բայց միության բոլոր անդամներին ողջունում եմ, հարգում եմ, ընդունում եմ և որպես երաժիշտ խնդրում եմ, որ Կոմպոզիտորների միությունն իր ակտիվ աջակցությունը ցուցաբերի շարժմանը»,- նշեց Դավիթ Ամալյանը։
Հարցին՝ ինչո՞ւ որոշ արվեստագետներ մինչ այժմ լուռ են և հստակ դիրքորոշում չեն հայտնում գործող իշխանությունների միակողմանի զիջումների վերաբերյալ, Դավիթ Ամալյանը պատասխանեց՝ ինքն ընդամենը մեկ օրինակ կբերի, որից հետո ամեն ինչ պարզ կլինի։
«Նատալի Ալեքսանյան անունով նիկոլապաշտ բլոգեր կա, իր ֆեյսբուքյան պատի նկարն Ալիևի, Նիկոլի և իր նկարն է։ Հիմա ինչո՞ւ է Ալիևի նկարը դրած Նիկոլ պաշտպանող բլոգերի պատին։ Ուզում եմ, որ շարժմանը չմիացողները բացեն և այդ նկարը նայեն։ Միգուցե այդ բլոգերն Ալիևի հետ ինչ-որ կապ է ունեցել, համը մնացել է բերա՞նը, չգիտեմ։ Դա իր անձնական գործն է, թող պատին չդնի։
Ես հիմա որևէ մեկի նկատմամբ ատելությամբ լցված չեմ, ուղղակի ուզում եմ՝ չմիացողները հասկանան, որ մենք այլընտրանք չունենք։ Մենք դատապարտված ենք հաղթնակի. մենք իսկապես պարտվել ենք հաղթնակին։ Այլընտրանք չունենք. այսս հաղթանակը վերածվելու է հայաստանյան նոր նվաճումների և մարդկային արժեքների»,- նշեց մեր զրուցակիցը։
Երգահանը միաժամանակ նկատեց՝ չստացված մի շարք մտավորականներ միշտ էլ գերադասում են հաշտվողական դիրքերում մնալ, սակայն դրանք իրական մտավորականներ չեն։
«Մտավորական բառն ինձ համար լրիվ ուրիշ արժեք ունի. մտավորականն ազգային, հասարակական և մարդկային արժեքների համար պայքարող մարդն է, բայց ոչ երբեք՝ նյութական արժեքների։ Մտավորականը Բագրատ Սրբազանն է, Գուրգեն Մելիքյանը, իրական պետություն ձևավորելու համար Սրբազանի կողքին կանգնած մյուս մարդիկ, մտավորականն այս պահին դիրքերում կանգնած զինվորն է»,- շեշտեց Դավիթ Ամալյանը։
Վերջում երգահանը նկատեց, որ թեև պատերազմը խլել է իր որդուն, սակայն ինքը համաձայն է, որ Հայաստանը որևէ օր հաշտվի Ադրբեջանի հետ՝ չկորցնելով սեփական արժանապատվությունը։
«Բայց սա հաշտեցում չէ. սա պատերազմի շարունակություն է և Ադրբեջանի առջև ծնկած նվաստացում, որովհետև մեր այսօրվա առաջնորդները բառացիորեն Ադրբեջանի քաղաքական գործիչներ են։ Թող հետևեն այդ երկրում կատարվող քաղաքական իրադարձություններին, թե ինչպես են վնգստում թուրքերը, որոնք չեն տարբերվում նիկոլականներից։
Ուզում եմ՝ շարժմանը չմիացողները պարզապես բացեն և նայեն նիկոլական այդ բլոգերի և Նիկոլին պաշտպանողների ֆեյսբուքյան պատերը»,- ամփոփեց Դավիթ Ամալյանը։
