Արցախցին երբեք չի հարմարվել իր վիճակին և մշտապես բողոքի ձայն է բարձրացրել՝ ի վերջո հասնելով ճնշումներից չվախենալու աստիճանի, գերադասելով ոտքի վրա մեռնել, քան ծնկած գոյատևել։ Մեր ժողովուրդն այս տրամաբանությամբ է ապրել, և երեկվա հանրահավաքն ասվածի վկայությունն է, Azg.am-ի թղթակցի հետ զրույցում ասաց ստեփանակերտցի Հասմիկ Միքայելյանը։
«Ես մայր եմ, որի երեք որդիները բարձրաստիճան սպաներ են, երեք պատերազմ են անցել, հիմա էլ թոռներս են ծառայում առաջնագծում։ Մենք մինչև վերջ կանգնելու ենք, մինչև վերջին շունչը պայքարելու ենք, որովհետև չենք հավատում թուրքի կեղծ քաղաքականությանը։
Մենք տարիներ շարունակ տեսել և հասկանում ենք, որ թուրքը, սկսած 1915-ից, միշտ էլ ուզել է հային ցեղասպանել։ Այսքանը զգալով՝ մենք հաստատ գիտենք, որ թուրքերն ու ադրբեջանցիները պատրաստ չեն հարևանություն անել, այլ թշնամության են պատրաստ։ Նրանց կոչերը միայն և միայն թշնամական են»,- ասաց արցախցի կինը։
Հասմիկ Միքայելյանի խոսքով՝ երեկ Ստեփանակերտում տեղի ունեցած համաժողովրդական հանրահավաքին մարդիկ եկել էին Արցախի տարբեր կողմերից՝ ոմանք ոտքով, ոմանք՝ մեքենաներով, ոմանք՝ ընդհուպ անթացուպերով՝ ցույց տալու, որ հաստատակամ են իրենց որոշման և պայքարի մեջ։
«Սա գրեթե վերջնակետն է, և մենք պատրաստ ենք դրան»,- ասաց նա։
Ստեփանակերտցի կինը շեշտեց՝ Նիկոլ Փաշինյանի՝ Արցախի վերաբերյալ դեռ 2018-ին արված առաջին հայտարարություններից է հասկացել՝ նա անկեղծ չէ։
«Փաշինյանը հայրենասիրության էժանագին շքերթ էր ցուցադրում, և դա զգալի էր նրա առաջին իսկ խոսքերից։ Նա թշնամի է, և ստեղծված իրավիճակում բոլոր ուժերը պետք է համախմբվեն, մի կողմ թողնեն իրենց հավակնությունները և հեղափոխություն անեն։
Կան հարցեր, որոնք դիվանագիտական, խելացի կոչերով հնարավոր չէ լուծել, այլ պետք է լուծել հեղափոխությամբ, այնպես, ինչպես ինքը՝ Փաշինյանն արեց։
Այլապես մենք կորցնում ենք ոչ միայն Արցախը, այլ նաև՝ Մայր Հայաստանը։ Մենք կորցրել ենք Նախիջանը, մենք կորցրել ենք Շուշին և Հադրութը, բայց չպիտի կորցնենք Հայաստանը։ Ես Փաշինյանին և իր կնոջը կոչ եմ արել մարդավայել հեռանալ, չի օգնել, որովհետև նրանք հայ ազգի թշնամիներն են»,- ամփոփեց Հասմիկ Միքայելյանը։
