Ճիշտն ասած՝ չգիտեմ՝ ավագանու առաջիկա նիստի օրակարգից տրանսպորտի ուղեվարձի թանկացման նախագծի դուրսբերումը վերագրենք մեր ճնշումներին, թե ոչ, բայց մեր խմբակցությունն այդ հարցով բավականին լուրջ ճնշումներ է գործադրում։ Azg.am-ի թղթակցի հետ զրույցում այս մասին հավաստիացրեց Երևանի ավագանու «Հանրային ձայն» խմբակցության անդամ Վահան Ավագյանը։
«Անցած ուրբաթ օրը՝ ավագանու նիստի ժամանակ, ես մեր ֆրակցիայի տեսակետը հայտնեցի և ուզում էի, որ ամբողջ հանրությունը լսեր դա։ Ես անընդունելի եմ գտնում հանրային տրանսպորտի այն սակագները, որոնք ի սկզբանե նախանշվել էին՝ որպես թանկացում։ Բավականին շատ հարցեր կան, որոնց առնչությամբ շատ խիստ քննարկումներ են տեղի ունենում»,- ասաց մեր զրուցակիցը։
Վահան Ավագյանը միաժամանակ նշեց՝ «Հանրային ձայն» խմբակցությանը չի ծանուցվել, թե որքան կտևեն միասնական տոմսային համակարգի ներդրմանն ուղղված ավագանու ներքին քննարկումները։
«Շատ հարցեր կան, որոնց պատասխաններին ենք սպասում, բայց այն, որ մեր դիրքորոշումն ուղեվարձի թանկացման հարցում շատ կոշտ է, երևի թե մեր գործելաոճից է երևում։ Ես խմբակցության անունից եմ ասում, որ նախապես հայտարարված սակագները մինիմում չեն գործելու։ Սա ամենաքիչն եմ ասում, էլ չեմ ասում, որ խոցելի խմբեր, զինվորականներ, ուսանողներ կան, որոնց համար մենք մինչև վերջ գնալու ենք։ Պետք է պարտադիր տարբերակված մոտեցումներ մշակվեն։
Մենք գնալու ենք մաքսիմալ հաստատակամ, ինչպես գնացինք կարմիր գծերի դեպքում։ Մենք հասանք այն բանին, որ կիրակի օրերը դրանք անվճար լինեն։ Սա բացառիկ բան է Հայաստանում, հնարավոր է՝ նաև արտերկրում։ Կիրակի օրերը կարմիր գծերն անվճար դարձնելն, ինձ թվում է, ցուցանիշ էր։ Նույնկերպ տրանսպորտի և մնացած բոլոր հարցերում «Հանրային ձայն» խմբակցությունը լինելու է ժողովրդի կողքին»,- ասաց ավագանու անդամը՝ հավաստիացնելով, որ անելու են առավելագույնը, որպեսզի երևանցին իրեն հարմարավետ զգա։
Հարցին՝ իրենց խմբակցության ծրագրերում կա՞ հանրային տրանսպորտի թանկացման հարցն առհասարակ չեղարկելու նպատակ, Վահան Ավագյանը պատասխանեց՝ տրանսպորտային բարեփոխումներ անհրաժեշտ են ինչպես մայրաքաղաքում, այնպես էլ մարզերում, քանի որ աշխարհի զարգացած մի շարք երկրներ վաղուց անցել են միասնական տոմսային համակագի։
«Նոր համակարգի ներդրումը դրական է, բայց պետք է հերթականությունը չխախտենք. ասենք՝ ոչ մի բան չփոխելով՝ թանկացնելու իմաստ ո՞րն է։ Ես գտնում եմ, որ պետք է տրանսպորտի խնդիրը լուծել, բայց լուծել այնպես, որ երևանցու համար իսկապես լավ լինի։ Մեր նպատակն այն է, որ Երևանում աշխատի լավ որակի, մատչելի տրանսպորտ, բոլորն օգտվեն դրանից, բացի այդ՝ հանրային տրանսպորտը մատչելի լինի։ Այդ դեպքում, ես ինքս էլ կիջնեմ մեքենայից և կնստեմ հասարակական տրանսպորտ։
Բայց նախ պետք է փոխվեն ցանցը, երթուղիները, պետք է համալիր գործողություններ արվեն»,- ամփոփեց Վահան Ավագյանը՝ հավաստիացնելով, որ Երևանի քաղաքապետը և ՔՊ խմբակցության գործընկերներն իրենց խորհուրդներից և առաջարկներից հետևություններ անում են։
Հիշեցնենք, որ Երևանում հանրային տրանսպորտի ուղեվարձի թանկացման նախագիծը դուրս է բերվել ավագանու առաջիկա նիստի օրակարգից։ Այս մասին ֆեյսբուքյան գրառմամբ ավելի վաղ հայտնել էր Երևանի քաղաքապետի տեղակալ Սուրեն Գրիգորյանը։
«Միասնական տոմսային համակարգի ներդրմանն ուղղված ավագանու որոշման նախագիծը բավականին լայն քննարկումների առարկա է դարձել։ Ուզում եմ վստահեցնել, որ բոլոր հարցերը և կառուցողական քննադատությունը լրացուցիչ քննարկման և նախագծի ստուգաբանման առիթ են դարձել՝ հենց քաղաքապետարանի ներսում»,-գրել էր նա։
Նշենք, որ նախագիծը բազմաթիվ քննադատությունների էր արժանացել ոչ միայն քաղաքացիների, այլև փորձագետների կողմից։
