Միանշանակ կողմնակից եմ պարտադիր կրթությունից դուրս մնացած երեխաների բացահայտման և ուղղորդման գաղափարին, Azg.am-ի թղթակցի հետ զրույցում ասաց կրթության փորձագետ Անահիտ Բախշյանը՝ անդրադառնալով ԿԳՄՍՆ-ի կողմից հանրային քննարկման դրված վերոնշյալ նախագծին։
«Երեխաները չպետք է դուրս մնան կրթությունից, և ողջունելի եմ համարում պետության՝ յուրաքանչյուր երեխայի պարտադիր հանրակրությունն ապահովվելու ուղղությամբ ներդրած ջանքերը»,- ասաց մեր զրուցակիցը։
Անահիտ Բախշյանի համոզմամբ՝ այն ծնողները, որոնք խոչընդոտում են իրենց երեխաների կրթության իրավունքի իրացմանը, պետք է պատասխանատվության ենթարկվեն։
«Երեխան պետք է սովորի, հանրակրթությունը պետք է պարտադիր լինի։ Սահմանադրությամբ ամրագրված այդ նորմը պետք է իրականացվի, և որևէ ծնող չպետք է իրավունք ունենա երեխային զրկելու կրթություն ստանալու իրավունքից՝ որքան էլ ընտանիքը նյութապես ծանր վիճակում լինի»,- շեշտեց կրթության փորձագետը։
Մեր զրուցակը նկատեց՝ ընտանիքի սոցիալական խնդիրները լուծելու, ընտանեկան բյուջեն համալրելու բազմաթիվ ճանապարհներ կան, բայց ոչ երբեք՝ երեխայի կրթություն ստանալու հաշվին, ասել է թե՝ ծնողների կողմից դպրոցահասակ երեխաներին փողոց կամ հարկադիր աշխատանքի ուղղորդելը պետք է օրենքով խոստորեն պատժվի։
«Կրկնում եմ՝ հիմնական կրթությունը պարտադիր է՝ անկախ երեխայի ծնողների կամքից։ Ընտանիքի խնդիրները տեղական ինքնակառավարման մարմինների տիրույթում են։ Այդ մարմինները պետք է բացահայտեն և զբաղվեն դրանց լուծմամբ։ Եթե իրենց երեխաներին հարկադիր աշխատանքի ուղղարդած գոնե մեկ ծնողի օրենքով՝ թեկուզ բարոյական, պատժի ենթարկեն, մյուսները կզգուշանան։
Բայց թե պետությունը որքանով խելացի կկազմակերպի այս գործը, արդեն ՏԻՄ-երի խնդիրն է։ Սա հեշտ աշխատանք չէ, բայց պետք է արվի»,- ասաց Անահիտ Բախշյանը։
Հիշեցնենք, որ ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել պարտադիր կրթությունից դուրս մնացած երեխաների բացահայտման և ուղղորդման կարգի նախագիծը:
Կրթությունից դուրս մնացած երեխաներին կրթության մեջ ներգրավման համար առաջարկվող լուծումներն են՝
1.դպրոցահասակ երեխաների՝ կրթությունից դուրս մնալը կանխելը,
2.ուսումնական հաստատությունից դուրս մնացած երեխաներին վաղ բացահայտելը,
3.ուսումնական հաստատությունից դուրս մնալու պատճառները բացահայտելը և դրանց վերացման համար միջոցներ ձեռնարկելը,
4.երեխայի ուսումնառությունը համապատասխան ուսումնական հաստատությունում ապահովելը:
