Հայաստանի ԶԼՄ-ներու պատասխանատուներուն ուշադրութեան.
Սիրելի գործընկերներ,
Ըստ շրջանառուած տեղեկատուութեան, Թուրքիան այս օրերուն կ՛իրականացնէ զինեալ գործողութիւն մը իր երկրի տարածքին, չէզոքացնելու համար «ահաբեկչական» օջախներ: Պետական ահաբեկչութեան ռահվիրայ Թուրքիան երբ խօսի «ահաբեկիչներու» մասին, ապա ան ընդհանրապէս նկատի կ՛ունենայ քրտական որոշ հատուածներ:
Հայաստանի ԶԼՄ-ներու լրատուութեան մէջ կը կարդամ լուրը մօտաւորապէս այս բովանդակութեամբ «Թուրքիայի զինված ուժերը երկրի 12 նահանգներում իրականացրել է «Քահրամանլար-33» գործողություն. հայտարարել է Թուրքիայի ներքին գործերի նախարար Ալի Երլիքայան։ Գործողության ընթացքում ոչնչացվել է ահաբեկիչների 78 թաքստոց»:
Նկատի ունենալով, որ նման գործողութիւններ ընդհանրապէս ուղղուած կ՛ըլլան Քիւրտ ազատամարտիկներու դէմ, կը հաւատամ, որ այս պարագային մեր կողմէ ալ «ահաբեկիչ» բառ հասկացողութեան օգտագործումը կը ծառայէ թրքական փրոփականտին:
Պէտք է հասկնանք, որ նոյնն է եթէ միջազգային լրատուամիջոցներ Արցախի մէջ խիզախած մեր տղոց կոչեն «ահաբեկիչներ»՝ կրկնելով ատրպէյճանական հակահայ քարոզչութիւնը։ Ատենին դարձեալ եւ մինչ «զոհ» (գոյական) կը նշանակէ մատաղ, զենում, չար դէպքի ենթակայ՝ նահատակ, մեր ԶԼՄ-ներու կողմէ նմանօրինակ սխալով մը, «զոհ» կ՛անուանուէին Արցախեան ճակատներու վրայ ազրպէյճանցի սատակուած զինուորները, գրելով օրինակ. «Ազրպէյճանական կողմը ունեցաւ (այսքան) զոհ»…:
Հերի՛ք է, մանաւանդ այսքան փորձառութենէ ետք հայելային անդրադարձումը դառնանք թուրք-ատրպէյճանական քարոզչական մեքենային։
ՍԵՒԱԿ ՅԱԿՈԲԵԱՆ
Լիբանանի ԶԱՐԹՕՆՔ օրաթերթի գլխաւոր խմբագիր
