Իմ հանդեպ միանշանակ քաղաքական հետապնդում է իրականացվում. դա որևէ բանական մարդու մոտ կասկած չի հարուցում։ Azg.am-ի թղթակցի հետ զրույցում այս մասին ասաց Երևանի Վ. Բրյուսովի անվան համալսարանի նախկին պրոռեկտոր Ցոլակ Ակոպյանը՝ անդրադառնալով իր նկատմամբ հանրային քրեական հետապնդում հարուցելուն։
«Դատարանի նիստը եղավ, վճիռը տրվեց։ Այս պահին տանն եմ։ Ես ինձ վերագրվող հանցանքը չեմ ընդունում, որևիցե մեղք չեմ գործել։ Ամեն ինչ կավարտվի, և հանրության համար ամեն բան պարզ կլինի »,- ասաց մեր զրուցակիցը։
Ցոլակ Ակոպյանը միաժամանակ հավելեց՝ չի կարծում, որ հանրային քրեական հետապնդում հարուցումը որևէ կերպ կազդի իր վարկանիշի և հեղինակության վրա, որովհետև դրանք ինքը ձեռք է բերել տարիների ընթացքում։
«Բոլոր բանական մարդիկ շատ լավ հասկանում են՝ խոսքն ինչի մասին է։ Այն մարդկանց, ովքեր իմ մասին այլ կերպ են մտածում, համոզելու ոչինչ չունենք։ Հանրության մեծ մասը, իմ ուսանողներն, ովքեր ինձ ճանաչում են, վստահ են, որ ես որևէ խախտում չեմ կարող կատարել,»,- ասաց մեր զրուցակիցը։
Երևանի Վ. Բրյուսովի անվան համալսարանի նախկին պրոռեկտորը նաև տեղեկացրեց՝ հետագա անելիքների մասին կորոշեն փաստաբանի հետ միասին։ Անհրաժեշտության դեպքում մամուլի ասուլիս կհրավիրվի։
«Միանշանակ մարտական եմ տրամադրված։ Սա էլ իմ պայքարի մասն է, որ ես պետք է պայքարեմ։ Երբ մտածում ես, թե ինչ է կատարվում այս պահին Բաքվում գտնվող մեր հայրենակիցների հետ, իմ հետ կատարվողը սովորական բան է թվում»,- ամփոփեց Ցոլակ Ակոպյանը։
Հիշեցնենք, որ դատախազը 2023 թվականի նոյեմբերի 30-ին հանրային քրեական հետապնդում է հարուցել 2018-2022 թվականներին «Երևանի Վալերի Բրյուսովի անվան պետական լեզվահասարակագիտական համալսարան» ՊՈԱԿ-ի սոցիալական գիտությունների և սերվիսի ֆակուլտետի դեկանի պաշտոնը զբաղեցրած Ցոլակ Ակոպյանի նկատմամբ՝ դիտավորությամբ այնպիսի գործողություններ կատարելու համար, որոնք ակնհայտորեն դուրս են եկել իր լիազորությունների շրջանակից:
Այս մասին հայտնում են ՀՀ գլխավոր դատախազության հանրային կապերի բաժնից:
«Հակակոռուպցիոն կոմիտեում քննվող քրեական վարույթով պարզվել է, որ Ց. Ա.-ն, զբաղեցնելով ՊՈԱԿ-ի սոցիալական գիտությունների և սերվիսի ֆակուլտետի դեկանի պաշտոնը, համատեղության կարգով հանդիսանալով «Փիլիսոփայության և պատմության», «ԲՊՀ հիմնադրամի Յունեսկոյի մարդու իրավունքների, ժողովրդավարության և քաղաքագիտության» ամբիոնների ավագ դասախոս, ՊՈԱԿ-ի ռեկտորի հրամաններով հանձնաժողովների կազմում ընդգրկված չլինելու պայմաններում, դուրս է եկել իր լիազորությունների շրջանակից:
Մասնավորապես՝ 2019-2022 թվականների ընթացքում անգլերեն առարկայից անբավարար գնահատականներ ստացած ուսանողներից՝ Ռ. Ն.-ից, Հ. Ս.-ից, Մ. Ա.-ից, Մ. Ծ.-ից, Ս. Ա.-ից, Վ. Մ.-ից և Ն. Պ.-ից, ընդունել է «1-ին օտար լեզու (անգլերեն) 4», «Գրավոր խոսք (անգլերեն)», «Գրավոր խոսք (անգլերեն) 2», «Բանավոր խոսք (անգլերեն) 3» առարկաների լուծարային քննություններն ու նշանակել դրական՝ «60» գնահատականներ՝ քննական տեղեկագրում հանձնաժողովի անդամի փոխարեն դնելով իր ստորագրությունը:
