Գյումրու գլխավոր ճարտարապետ Հենրիկ Գասպարյանը ձերբակալվել և կալանավորվել է կաշառք վերցնելու մեղադրանքով։
Հիշեցնենք, որ հոկտեմբերի 20-ին ԱԱԾ-ն ու իրավապահները քննչական գործողություններ են իրականացրել Գյումրիի քաղաքապետարանում, ինչին հաջորդել է Վարդան Ղուկասյանի, Գյումրու գլխավոր ճարտարապետ Հենրիկ Գասպարյանի ձերբակալությունը։ Քրեական վարույթով ընդհանուր առմամբ ձերբակալված է ութ անձ։
Ըստ Հակակոռուպցիոն կոմիտեի տարածած հաղորդագրության՝ վարույթը վերաբերում է կաշառք ստանալուն և տալուն։
Ըստ վարույթի՝ Գյումրի համայնքի ղեկավարը և գլխավոր ճարտարապետը, տեղեկանալով այն մասին, որ քաղաքացու կողմից Գյումրի համայնքի Գարեգին Նժդեհ փողոցի 1/9 հասցեում կառուցվել է շուրջ 1500 մ2 մակերեսով ինքնակամ շինություն, որը ենթակա է եղել քանդման, եկել են նախնական համաձայնության՝ քաղաքացու հետ մտնել «կոռուպցիոն» գործարքի մեջ՝ խոստանալով կառուցված ինքնակամ շինության քանդման ուղղությամբ միջոցներ չձեռնարկել, ավելին՝ կազմել շինությունն իբրև քանդված և նոր կառուցված լինելու վերաբերյալ պաշտոնական կեղծ փաստաթղթեր, օրինականացնել այն՝ դրա դիմաց պահանջելով խոշոր չափերով՝ չորս միլիոն ՀՀ դրամ գումարի կաշառք։ Վարդան Ղուկասյանը մեղադրվում է կաշառք պահանջելու մեջ, մեղադրանքը չի ընդունում։
Ղուկասյանի նկատմամբ որպես խափանման միջոց է ընտրվել կալանավորումը։ Կաշառք տալու մեջ մեղադրվող անձանցից մեկը տնային կալանքի տակ է։
Հիշեցնենք, որ Վարդան Ղուկասյանը ձերբակալվել է՝ 10.000 դոլար կաշառք ստանալու մեղադրանքով։
