ՀՀ վերաքննիչ քրեական դատարանը մերժել է դատախազության բողոքը: Ի հեճուկս զինվորականներին պատժից ամեն գնով փրկելու դատախազության տենչանքին` Զավեն Գրիգորյանի դեմ ցուցմունք տվածների դեմ սուտ մատնության հատկանիշներով քրեական վարույթ, այնուամենայնիվ, կնախաձեռնվի։ Այս մասին ֆեյսբուքյան իր էջում գրել է փաստաբան Լևոն Սահակյանը։
Նշենք, որ 2019 թ. սեպտեմբերի 18-ին անգիտակից վիճակում, «գլխուղեղի աջ կիսագնդի միջին աստիճանի սալջարդ, աջ քունք-գագաթային, ճակատային բլթերի շրջանի սուբդորալ հեմատոմա՝ արտահայտված քունքտենտորյալ լատերալ դիսլոկացիայով» նախնական ախտորոշմամբ, հիվանդանոց էր տեղափոխվել ՀՀ ՊՆ զորամասի սպա Արա Մխիթարյանը և ենթարկվել է շտապ վիրահատության:
Դեպքի առթիվ հարուցվել էր քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով:
Քննությամբ տվյալներ են ձեռք բերվել այն մասին, որ սպան մարմնական վնասվածքներն ստացել է 2019 թ. սեպտեմբերի 17-ին՝ ժամը 23:40-ի սահմաններում, պարզաբանումներ ստանալու հարցի շուրջ ծագած վիճաբանության ժամանակ:
