Ընթացիկ տարվա օգոստոսի 1-ից hանրապետության 4 մարզերում կառուցապատման համար անհրաժեշտ քաղաքաշինական փաստաթղթերի տրամադրման գործընթացն իրականացվելու է բացառապես էլեկտրոնային եղանակով:
ՀՀ քաղաքաշինության կոմիտեից մանրամասնում են, որ մասնավորապես Կոտայքի, Արմավիրի, Արարատի և Լոռու մարզերում կառուցապատում իրականացնելիս համայնքի ղեկավարի կողմից տրամադրվող քաղաքաշինական փաստաթղթերը ստանալու համար անհրաժեշտ է լինելու էլեկտրոնային դիմում ներկայացնել urban.e-gov.am հարթակի միջոցով։
Ճարտարապետության և քաղաքաշինության վարչության խորհրդական Դավիթ Դալլաքյանի խոսքով՝ «Քաղաքաշինության մասին» ՀՀ օրենքի համաձայն՝ 2025 թվականից ամբողջ հանրապետության տարածքում քաղաքաշինական թույլտվությունները տրամադրվելու են էլեկտրոնային համակարգի միջոցով։
Ուստի պետք է ձեռք բերել նույնականացման կամ բջջային նույնականացման քարտ։
Քաղաքացիները, կազմակերպությունները կամ նրանց կողմից լիազորված անձինք կարող են էլեկտրոնային համակարգում հետևել իրենց դիմումի ընթացքին։ Գործընթացի բոլոր մասնակիցների՝ պետական գերատեսչությունների, տեղական ինքնակառավարման մարմինների, մատակարար և այլ կազմակերպությունների աշխատանքը կլինի թափանցիկ ու վերահսկելի։
Հայաստանի ամբողջ տարածքում քաղաքաշինական թույլտվությունների տրամադրման գործընթացը թվային եղանակով նախատեսվում է իրականացնել 2025 թվականի հունվարից։
Քաղաքաշինական թույլտվությունների տրամադրման գործընթացը կանոնակարգվում է «Քաղաքաշինության մասին» ՀՀ օրենքով ( https://www.arlis.am/DocumentView.aspx?DocID=190370), ՀՀ կառավարության 2015թ. մարտի 19-ի N 596-Ն (
https://www.arlis.am/DocumentView.aspx?DocID=181050) և 2021թ. դեկտեմբերի 2-ի N 1985-Ն որոշումներով (
https://www.arlis.am/DocumentView.aspx?DocID=193683)։
