Փաշինյանը մի քանի անգամ հրապարակային հանձնարարել էր վերացնել բնակավայրերում եւ մայրուղիներին տեղադրված շահումով խաղերի ՝ ուղղակի եւ թաքնված գովազդները: Հուլիսի 7-ի գործադրի նիստին նորից խոսել է թեմայից, զայրացել՝ իր հրահանգները չեն կատարվում:
Իսկ ուշադրությունն այս խնդրին պատահական չէ: Հայաստանում խաղամոլության աննախադեպ տարածվածությունից դեռ այս տարեսկզբին խոսեցին հենց Քպ-ականները, երբ գովազդի մասին օրենքում փոփոխություն էին նախաձեռնել եւ առաջարկել սահմանափակել խաղային ոլորտի գովազդը: Այսպես, 2021 թվականի հունվար-նոյեմբեր ամիսներին Հայաստանում գործող խաղային ոլորտի ընկերությունների միջոցով կատարվել էր շուրջ 3.2 տրիլիոն դրամի խաղադրույք (այդ պահի փոխարժեքով՝ մոտ 6.6 միլիարդ դոլար): Այս ցուցանիշն իշխանություններին ստիպեց եւս մեկ փոփոխություն նախաձեռնել՝ այս անգամ «Շահումով խաղերի, ինտերնետ շահումով խաղերի և խաղատների մասին» եւ «Վիճակախաղերի մասին» օրենքներում, որոնցով արգելվեց խաղադրույք իրականացնել կանխիկ միջոցներով նաեւ փողոցներում տեղադրված վճարային սարքերի միջոցով:
Այսօր Փաշինյանն ավելի կոշտ հրահանգ է իջեցրել:
