«Մնում է, որ ես զենքը վերցնեմ ու գնամ իմ որդուն այդ տարածքից հանեմ-բերեմ։ Անտեր Հայաստան. ուրիշ ոչ մի բան չեմ կարող ասել։ Ասում են՝ թուրքը կրակում է, չի թողնում, որ այդ տարածք մտնենք, ձեր տղային հանենք։ Պիտի բանակցենք, մոտ ապագայում ձեր հարցը կլուծվի։ Մոտ ապագայում… Էդ մոտ ապագան ե՞րբ է»,-անզոր հարցադրում է անում Վահե Թորոսյանի մայրը։
Սեպտեմբերի 15-ին Սյունիքի Վերին Հանդի տարածքում վիրավորված Վահե Թորոսյանի հարազատներն այսօր Կառավարություն էին եկել՝ հանդիպելու պատկան մարմինների հետ ու պատասխան լսելու՝ մեկ ամիս է անցել, իրենց վիրավոր որդուց լուր չունեն, մինչև հիմա ոչ ոք չի գնացել նրան օգնելու, Վերին Հանդի տարածքից հանելու։
Վահեն անհետ կորած է համարվում, թեև նրա գտնվելու վայրը Պաշտպանության նախարարությունում գիտեն։ Գիտեն նաև ծնողները։ Վահեն սեպտեմբերի 15-ին վիրավորվել է ուսից, գլխից ու ոտքից։ Այլ տեղեկություն նրա մասին հայտնի չէ։
