«Մահվան համբույր» կամ լուսանկար՝ մահվանից րոպեներ առաջ

Այս լուսանկարն արվել է հեռավոր 1957-ին ու ստացել «Մահվան համբույր» անվանումը։ Նկարում Հայտնի երգչուհի Ռոմինա Փաուերի մայրը՝ դերասանուհի Լինդա Քրիստիանը, համբուրում է մեքենայի ղեկին նստած մարզիկ Ալֆոնսո դե Պորտագոյին։ Իսկ ինչո՞ւ է լուսանկարը «Մահվան համբույր» կոչվում․ BigPicture հարթակն է պարզել։

Ասում են, որ Պորտագոն վստահ էր՝ 100 տարի է ապրելու։ Բայց նրա կյանքն ավարտվեց 1957-ի մայիսի 12-ին՝ «Mille Miglia» խորագրով ավտոմրցաշարի ժամանակ։ Ժամանակագիրներն ասում են, որ մարզիկն իրականում չէր ցանկանում մասնակցել մրցույթին, բայց ճակատագիրը նրա փոխարեն ամեն բան որոշել էր։

Մրցաշարի մեկնարկից հետո անցնելով 500 մետր՝ Ալֆոնսոն նկատում է իր սիրելիին՝ դերասանուհի Լինդային, արգելակում է մեքենան ու միայն կրքոտ համբույրից հետո շարունակում մրցապայքարը։ Երբ արդեն եզրագիծը բավական մոտ էր, արագընթաց երկաթե նժույգի անվադողը դուրս է թռչում տեղից, ինչի պատճառով ավտոմեքենան մի քանի մետր թռչում ու մարդկային հոծ բազմության մեջ է հայտնվում։ Վթարի հետևանքով 11 մարդ է մահանում, այդ թվում՝ Պորտագոն։ Ցավոք, նաև՝ 5 երեխա։

Սիրահար զույգի սիրառատ լուսանկարը հենց այս պատճառով էլ  «Մահվան համբույր» անունն է ստանում։

Ս․Վ․