«Մուրճի», իսկ իրականում՝ «չալիկի» գործով ոչ մի ոստիկանի մեղադրանք չի առաջադրվել

22

Հունիսի 3-ին տեղի ունեցած ենթադրյալ զանգվածային անկարգությունների վերաբերյալ իրականացվում է 5 անձի օրինական շահերի պաշտպանություն։ 5-ից մեկի կալանավորման միջնորդությունը դատարանը մերժել է։ 3-ը հուլիսի 3-ի ուշ երեկոյան ազատ արձակվեցին Արմավիր քկհ-ից, իսկ մյուս անձը կալանավորման մեջ կմնա հայտնի «չալիկի» գործով։

«Կգա ժամանակ, և վարույթ իրականացնող մարմինը հարկադրված կլինի հրապարակել այդ առարկայի լուսանկարը։ Առարկան առգրավված է, գտնվում է քննչական մարմնում, զննվել է։ Զննության արդյունքն էլ կհրապարակվի»,- համոզված է փաստաբան Նարեկ Ալոյանը։

Մարտական ուղի անցած անձը «չալիկի» գործով գտնվում է կալանքի տակ։

Փաստաբան Նարեկ Ալոյանը ևս ներկա էր կալանավորված անձանց ազատ արձակմանը։ Նա ամփոփ ներկայացրեց պատկերը. «Հունիսի 3-ին տեղի է ունեցել ենթադրյալ զանգվածային անկարգության դեպքը։ Հունիսի 6-ին ոստիկանությունը հրապարակել է տեսանյութ, որում պատկերված է նշված անձը, նաև ենթադրյալ մուրճը, իսկ իրականում՝ ձեռնափայտը։ Հունիսի 9-ին լրատվական կայքերից մեկում հրապարակվել է տեսանյութ, որն առավել ամբողջական է, քան ոստիկանության տեսանյութը։

Ոստիկանը ցուցմունք է տվել, թե այդ առարկայով հասցվել է 4-5 հարված, բայց երկրորդ տեսանյութում հստակ երևում է, որ ոստիկանը, որը քաղաքացու ձեռքից խլում է ձեռնափայտը, նույն ձեռնափայտով պատասխան հարվածներ է հասցնում։ Ընդ որում՝ այս գործով որևէ ձերբակալված ոստիկանի մասին տեղեկություն չունենք, նաև չկա տեղեկություն, որ ոստիկանության որևէ ծառայողի մեղադրանք առաջադրված լինի, մինչդեռ համացանցում բազմաթիվ տեսանյութեր կան, որոնցում երևում են քաղաքացիների ուղղությամբ շիշ, տարբեր առարկաներ նետող ոստիկաններ։ Գործ ունենք երկակի ստանդարտի հետ»,-մեկնաբանել է փաստաբանը։

Նշենք, որ հուլիսի 3-ի ուշ երեկոյան Արմավիր քկհ-ից ազատ է արձակվել ենթադրյալ զանգվածային անկարգությունների գործով կալանավորված 7 քաղաքացի։